Bo yu ta wak porno

Dikon bo por bisa bo yunan shen mil biaha pa “No hisa man pa bo ruman” o “Si bo mishi ku e fòrnu e ta kima bo” o “mira pa bo mishi ku droga” pero ora yega e momentu pa menshoná sèks o porno bo ta kere ku bo por menshoná e tópiko ariba ariba pa despues bòltu e kombersashon? Kisas bo ta kere ku bo no tin ni nodi di papia tokante e tópiko aki ku bo yu mes. Tur hende sa kiko ta wòrdu konsiderá komo porno. Pa hopi e ta eksistí “ei fo” pero no den nan kas.

E fasilidat di akseso na pornografia a kambia drástikamente. E stapel di revista (skondí) ku abo ta kòrda tempu di bo infansia ta totalmente diferente for di e kontenido seksual eksplísito ku hóbennan di awe ta keda eksponé na dje. Estudionan internashonal ta mustra ku mayornan ta balotá e kantidat di porno ku nan yunan tin akseso na dje. Mundialmente e proporshon di mucha ku a yega di mira porno ta varia entre 43% te ku 99% dependé nan edat. Nan ta kuminsá ora nan tin 10 o 11 aña. No tin niun motibu pa kere ku na Kòrsou lo ta otro.

Ya ku bo no por evitá bo yu di wak porno, bo mester prepar’é pa lokual e lo topa un dia. Hibando un kombersashon habrí i basá riba echonan bo por benefisiá bo yu hopi mes. Ta probá ku mucha ku risibí edukashon seksual for di chikí tin muchu mas chèns pa:

• Sinti nan mes positivo tokante nan kurpa
• Tuma desishonnan seksual na un manera responsabel mas lat den bida
• Ta mas kapas di komuniká tokante tópikonan seksual
• Ta komprondé kiko ta enserá komportashon apropiá

E kultura di Kòrsou ta unu kaminda e tópiko di porno no ta keda tratá entre mayor i yu. Dikon mayornan ta asina kobarde? Hopi mayor ta biba añanan den kas huntu ku nan yunan te dia ku e yu bai studia afó sin nunka papia ku nan tokante sex. Tur loke un mucha no siña na kas, e ta siña riba kaya. Dikon laga un tópiko asina importante den man di hende straño?. Mi ta kere ku hopi ta asumí  ku si nan kuminsá papia ku nan yu nan tin ku siña e mucha delaster un kos. Esei no ta e kaso. Bo no tin nodi di bai den luho i detaye pero pone bo yu sinta i splike ku:

• Aktor i aktrisnan di porno no ta suponé di mustra real. Gran mayoria di e kurpanan ta modifiká i no por keda kompará ku naturalesa.
• Porno ta fantasia, E no ta real. Porno ta e “fast food” den e mundu di seksualidat. Den e bida normal sex ta djis un parti di un relashon sano. Realidat ta ku den e mesun relashon ei sex no ta mustra ni zona manera den pornografia.
• E ekspektativa i simplesa di sekso den porno no ta realístiko i por kousa daño na un relashon. Sèks mayoria bes ta bini kompaña pa emoshon. Algu ku ta keda intenshonalmente atras den pornografia.

Lo ta bon pa mayornan kuminsá e kombersashon ku nan yunan tokante sekso i spesialmente porno. Na mes momentu mi ta kere tambe ku laga e tópiko aki na e mayornan no ta e solushoná e problema den su totalidat. Mayoria mayor no ta ekipá pa papia o splika. Tin ku tin problema pa papia ku nan mes su pareha. Otro lo no sinti nan mes konfortabel o tin asta bèrgwensa pa papia tokante porno ku nan yu. Tambe tin un grupo ku mester di splikashon pa nan mes.

Mi ta kere ku a yega ora pa skolnan introdusí e tópiko i habri e diskushon tokante porno komo parti di edukashon seksual na skol. Asina Kòrsou lo tin un mihó bista di kiko e muchanan ta siñando. Tur skol por apliká e mesun material. Tambe por trese informashon di un forma konsistente, apropiá i basá riba nan edat.

Paso kòrda ku maske un mucha no tin pregunta, o ta mustra “verlegen” ta e mayornan su deber di kuminsá i kontinuá e diálogo. Silensio no kièr men falta di kuriosidat.