Kerido Nicole,
Bo ta kòrda tempu bo tabata biba na Kòrsou kon bo bida tabata ? Bo ta kòrda kon bo tabata sali skol, kue bus bai kas i bolbe kue bus bai trabòu mas atardi ? Bo no ker a molestia bo mama. Bo deseo di independensia semper tabata grandi.
Bo ta kòrda kon bo tabata djis un tiner ku akné ? Tur di stress pa situashon nan di bida…
Semper ba tende ku bo no parse bo edat. Hopi a bisa ku bo mente a krese muchu lihe. Podise bo alma ta unu bieu kaba?
Apesar di tur esaki semper ba lucha, traha duru na skol i purba hari ku bida. Ku fe den Dios i den bo mes ba logra yega bastante leu kaba. Un dams di tiki edat pero ku hopi di bisa. Di tiki edat pero ku un kurason grandi. Mas grandi ku di kualke ansiano.
Situashon nan semper lo presenta, no lubida. Kòrda semper pordona, siña bo les for di tur situashon i sigui pa dilanti.
B’a hasi un eskoho. Bo ta hopi patriotiko, bo sa si ? Ba bai biba afo i ba bisami ku ta pa bo yuda bo pais den futuro.
No lubida kiko bo tabata pensa ora ba start e proyekto aki. E proyekto pabo kresementu personal. Bo ker a mustra mundu ku bo mente ta miho ku bo atras.
Pero por fabor sea alerta. Bo ta mane un galiña di oro den un kòuchi yená ku gai di koper. Nan no ta interesá den bo mente ni kurason. Solamente den loke bo ta kapas di hasi òf laga. Bo’n ta mira kiko tur ta keda puntra ? Paga tinu riba nan puntonan di interes.
Tende mami, no laga nan shusha bo kabes. E kosnan ey ta kosnan pasahero ku por tin konsekuensianan inplasentero ku ta dura eterno.
Djis sigui riba e ruta ku bo ta. Kòrda ku eksito ta ensera kai i lanta bek. No djis trompeka. Bo tin di kai, kibra na filingrana i lanta sigui ku bida.
Unda bo ta aworaki? Biba bo presente ku alegria i positivismo.
Awe bo ta skohe di kore baiskel of kue tram. Si skohe. Paso bo a skohe pa un futuro ku ta rekerí lagrima i sodó di bo frenta.
Mi sa ku bo ta sinti mane ta abo ta Buchifil i bo isla ta bo Mosanena pero no laga e sintimentu dominabo Collie!
Hopi ta desea di ta kaminda abo ta. Simplemente bendishoná. Apresia kada dia ku bo por biba. Sigui kere den bo mes. Sigui kere den hasi bon. Sigui duna amor. Tur kos lo sali bon.
Djis korda ku tur hende tin nan krus. Hasi mane ba hasi semper. Huza bo krus mane ta barbèl den gym. Hise, bahe i traha muskulo ku n’é.
Kita bo oloshi for di ora di Kòrsòu. Lanta for di kama, dal un baño i komportabo mane bo tabata hasi aya tambe. Pinta bo kara, peña bo kabei, spùit kolonia i disfruta di bo bida. No laga pa ora bo wak atras bo rekuerdonan ta di tristesa so.
Ku hopi amor i ternura,
Mi Mes.