Pa kiko unifòrm di skol ta sirbi?

Loke un alumno bisti bai skol tin influensia riba kon e lo prèsta na skol? E pregunta aki a bolbe lanta kabes riba ‘sosial media’ últimamente. Ta parse ku Kòrsou tin diferente eksperto riba e tereno aki. Tur hende tin un opinión. Ni e kampo di “si” tampoko e grupo di “no” no ta baha kabes pa otro. Manera ta konosí di e bon yu di Kòrsou rápidamente argumentonan ta subi mesa sam sam ku e emoshon. Aparentemente e pregunta aki por pone hopi emoshoná.

Ami ta buskando skol pa mi yu. 10 mil aspèkto pa tene kuenta ku ne pero unifòrm no ta unu di nan ya ku aki na Singapore tur skol ta bisti unifòrm. E ta reglá den lei di enseñansa. Asta na krèche ora ku e muchanan hasi 24 luna nan ta verwacht di ta bisti unifòrm. Den mayoría kaso e unifòrm ta muchu mas ku un poloshirt. Tin skol kaminda e unifòrm ta konsistí di kamisa, poloshirt, karson kòrtiku i largu, dashi, trui, mea i sapatu. Saya i karson pa e mucha muhénan. Pa algún skol hasta e tas di skol ta parti di e unifòrm. Pa mi quote un brochure ku mi a haña ultimo ey: “The only thing to rebel against here is education itself.”

Ku mi kièr o laga mi mente ta bai bèk temporada ami tabata bai skol na Kòrsou anto ku no ta tin niun unifòrm ahinda. E temporada ey ta bo tabata mira bon kla kon tabata distinguí e “have nots” for di e “have it alls”. Esun ku no tabata por mester a hala atrás laga esun ku por skor. Ami sigur tabata den e delaster grupo ey. Karson Levi’s di Jannina den diferente kolo anto tur schooljaar mi kèds tabata e ultimo modelo saká foi Footlocker na Merka ora skol kuminsa. Asina mi tabata sigurá mi mes ku mi kèds tabata uniko den kura di skol pa sigur dos tres luna. Komo mucha mi no tabata para ketu i realisá ku mi tabata privilegiá. Awor ku bo mes tin yu i e moda pa malkria, konstantemente mi ta buska e balansa.

“Schools should be schools and not fashion shows”

Sin duda e kritíkonan di un skol ku unifòrm ta bisa ku unifòrm ta stroba e muchanan di ekspresá nan mes individualmente, ku e ta stroba nan pensamentu kreativo o ku resultadonan di èksamen no tin nada di haber ku unifòrm. Tin ku ta asta mara unifòrm na kolonialismo. Tur hende ku dos plaka di sintí sa ku gran parti di e puntonan aki no ta berdat.

Unifòrm di skol     Pic credit: Whoolworths

Di e otro un banda mi ta mira e benefisionan di un unifòrm manera;

Bistiendo un unifòrm ahinda un mucha por ekspresá su mes. Su pelá, kabei, asesorionan, su komportashon o su smile tur ta manera pa ekspresá su mes. Unifòrm ta finansieramente eficiente. Ademas un unifòrm ta kita e kompetensia den bistimentu i  laga muchanan konsentrá riba loke ta realmente importante. Bo yu ta bai skol pa siña, no pa modela. Unifòrm ta krea unión, tur mucha ta “fit in”. Bistí meskos e muchanan ta yena ku orguyo di ta pertanese na nan skol. Por ultimo unifòrm ta yuda frená tentamentu den kura di skol. Hopi mucha ta sufri den silensio di esaki.

Na Kòrsou nos no ta sakando e benefisionan aki pa motibu ku nos ta mira unifòrm komo un simpel poloshirt. Pa kolmo tur mucha ta bisti e polo manera nan haña ta bon. Dia ku skol a laga basta mucha pafó pa motibu ku nan karson no tabata blou skùr, ta masha mama a rabia i zundra. Na Kòrsou nos stima mediokresia. Kla o no kla nos ta konté komo kla. Unifòrm den kura di nos skolnan no ta un eksepshon. Kiko abo ta opiná?

A yega ora pa nos definí unifòrm di skol foi pia te kabes pa nos muchanan?

7 tep pa e hòmber chikí tambe biaha

Hopi biaha nos ta pensa ku biahamentu ta kosta “macha hopi sèn messss”. Biahamentu ta kosta sèn bèrdat, pero no nesesariamente un fortuna. E idea ku ta hende riku so por biaha ta pertenesé na pasado kaba.

No ta importa si bo ta studiante òf si bo tin bo trabòu fiho kaba. Ku e 7 tepnan aki bo por saka lo máksimo for di bo fakansi pa menos sen.

1. Hasi biahamentu bo pashon.

Pa bo yega na sa e maña nan di e mundu di aerolinia, hotel i transporte bo mester inverti tempu pa atkeri sufisiente konosementu riba e topiko aki. Awendia esaki ta posibel riba internet mes. Pues e lo no kostabo ni gasolin ni karchi di telefon pa bai bin òf pa bèl aki aya.

Unabes bo sa de que se trata bo lo sa kon pa buska i haña pasashi, hotel i transporte na prèis di baka flaku.

2.Plania bo fakansi delantá.

Delantá den e kaso aki ta nifiká por lo menos 4 luna prome ku e biahe mester tuma lugá. Si awor aki bo sa kaba unda bo ke bai den verano di 2017 bo tin henter un aña pa bo buska pasashi i hotel òf hostel trankil.

Un bentaha grandi ku ta bini ku e planifikashon delantá di bo fakansi ta ku hopi bia kos ta mas barata ora bo paga nan for di trempan. Na kompra di bo pasashi i estadia di hotel, por èhèmpel, bo por haña un « early booking discount ».

3. Buska aktividatnan riba internet for di trempan.

Atrobe bo lo por haña deskuento riba hopi kos. Tambe bo por skapa paramentu den rei por èhèmpel den parkenan di atrakshon òf museonan. Apesar di haña deskuento riba bo sèn i riba bo tempu, bo lo ta na altura di kiko tur tin pa hasi. Evitá di yega kas bèk i lamentá ku bo no a hasi sierto kosnan.

4.Skohe un hotel òf hostel ku ta inkluí desayuno.

Desayunando na bo luga di estadia lo no ta nesesario pa saka sèn na desayuno tur dia. Aki bo ta bolbe skapa bastante sèn i tempu.

Bo por asta kue un apel èkstra, por èhèmpel, pa bo kome na kaminda mas den dia.

5. Huza transporte publiko.

Hasi bo investigashon for di na kas, si ta posibel, pa bo sa kon e transporte publiko ta hinká den otro na bo destinashon, unda tur bo por yega ku n’é i kuantu e ta kosta. Evitá di huza taxi. Esakinan mayoria biaha ta kostoso. E sèn ey bo por spar e pa bo sigiente fakansi.

6. Sea balente!

Tene kurashi i negoshá ku, por èhèmpel, e bendedónan di souvenir riba kaya.

Habri bo boka pidi deskuento. Sierto paisnan ta ofresé hopi deskuento na studiantenan òf penshonadonan. No tene bèrguensa. Djis puntra si tin un ke otro posibilidat pa loke bo tin di paga salibu mas barata. Si bo skapa 5 florin 10 bia, bo a skapa 50 florin. No hinka den bo kabes ku ta yu di un shèik bo ta i ku 5 florin ta « djis 5 florin ».

7. Skohe e establesimentu di estadia ku bo por afòrt.

Bai afó no ta nifika ku bo mester keda den un hotel di 5 strea. Bo por keda den un hotel menos karu of un hostel asta. Abo mes ta disidi si bo ta pasa bon si of no.  Pensa ku ta djis un kaminda pa bo drumi i baña bo mester. Apresia e oportunidat pa ta den un pais eksterior i djòdjò numa na bo destinashon.

 

Tep di bonus : korda paga loque debe prome bo bai pa evitá kangamentu di saya, spar un tiki tur luna pa bo tin sèn di gasta dia di e biahe i no tuma bòn tampoko pa kumpra bo òutfit di aeropuerto. Ora bo bin bek ta bida di tur dia lo sigui.

Kordialmente,

Nicole

Bright Ideas: Part 2 – Skarsedat di bom di gas

Awe e di dos parti di Bright Ideas, e konsepto ku kièr genera solushonnan pa problemanan di Kòrsou.

Un di e motibunan ku mi ta blog riba Ta’ki mi ta Beba ta paso mi kièr kontribui na bienestar di mi pais maske mi no ta biba na Kòrsou. Sintá na e otro banda di mundu mi ta konvensí ku ta positivismo i partisipashon so lo por yuda.  Kòrsou ta manera e ta paso e mayoria a laga un grupito disidí kiko ta sosode. E momentu a yegá pa stop di reklamá sintando komodo tras di kompiuter. Ku e mesun energia nos por logra solushonnan pa problemanan den nos pais.

Tur ku stima Kòrsou di berdad ta obligá na kontribui na su bienestar

Na oktober aña pasa Curgas a informá ku lo bai tin 850 silinder nobo den sirkulashon pa asina redusí e retraso ku a surgi den e kadena di distribushon. Curgas a anunsia tambe ku nan lo apliká entrega konforme e sekuensia kronológiko di pedido. Mi ta korda tempu mi tabata chikí kon bisiñanan a bin fia silender di gas paso di nan a kaba. Nan ta tin ku warda simannan largu riba Curgas pa bin trese un nobo. 30 aña a pasa i ketubai tin hende ku tin ku warda mas ku 2 luna riba entrega di bom di gas. Kon esaki ahinda por ta posibel?.

Silindernan nobo di Curgas.

Ata na plaka chikí kon Curgas por hasi entrega di silinder mas efisiente:

Na prome luga si Curgas sigui entrega silinder konforme e sekuensia kronológiko di pedido, e truk lo keda kore ront Kòrsou gasta tempu balioso. Loke Curgas por hasi ta parti Kòrsou den 5 distrito, Djaluna truk ta bai St Joris, Fuik i Ronde klip, Djamars ta bai Brievengat, Biesheuvel i Schelpwijk. Ta sigui asina te ku Djabierne e ta yega Barber, Soto i Wèspen. Tur siman meskos. Asina aki e truk ta kore dirigí, skapa tempu i e kliente sa adelanta ki dia di siman Curgas lo ta den su bario.

Na di dos luga Curgas lo tin ku konsentrá riba e aktividat di mas balioso ku ta e entregamentu i no e yenamentu. Si Curgas duna 7 hoben e trabou di yena 150 silinder anochi na nan stashon di Muizenberg, asina 9ór di mainta bati, nan por saka 5 truk kargá ku 30 silinder kada una pa entrega. E truknan ta bai e barionan ku ta na turno e dia ey.

Al final e modelo aki ta por keda realisá sin muchu invershon di parti di Curgas. E truknan tey kaba. Trahadonan di truk tey kaba. Stashon di yena gas tey kaba. Ta e 7 hobennan so lo mester rekrutá. Komo bonus Curgas lo por keda yena silinder durante dia pa e kliente ku presenta ku su propio transporte.

E benefisionan di e modelo aki ta ku:

• E ta krea kupo di trabou pa 7 hoben
• Tur dia bo ta entrega i rekohe 150 silinder hasiendo 75 pa 150 famia kontentu,
• E konsumidó sa adelanta ki dia e por spera Curgas den su bario.
• Despues di algun siman bo lo no tin lista de espera mas i e truknan por sali entrega den un tempu muchu mas kortiku.
• Si e konsumidó lo tin ku warda maximal 1 siman so.
• Si Curgas huza e datosnan ku e ta kolektá durante lunas, nan por pre-mirá ki temporada un kliente su silinder lo kaba i advertí e kliente pa medio di un sms. ( Paso si e ultimo 3 silendernan a durabo 5 luna, chèns ta grandi ku e siguente tambe lo durabo 5 luna).
• Curgas por duna diskuento pa e kliente ku bin yena su silinder ku propio transporte. Paso e yu di korsou stima un gangá!

No tene miedu di aportá

Mi ta bisa asina pa motibu ku mi ta mira hopi hende kreativo kanando rònt ku ideanan bunita, inovativo i bon pensá sin ta hasi net net nada ku nan. Mi ta kere ta e kultura di miedu ta dominá. Dios sa kuantu idea genial i innovativo a drenta santana!

Laga un komentario atrás pami sa kiko bo ta pensa. I si bo tin algu pa agregá, o konose un trahado di Curgas, nan ta mas ku bon bini pa aportá!

Ban laga Curgas sá ku nos por yuda nan!.

Aportá bo granito awe mes!.