Tras di Kortina

Fin di aña

Mi ultimo blog di 2015. Tokante kua tópiko lo mi skirbi e siman aki?.

Tin asina tantu tópiko pa trata ku tin biaha ta difisil skohe unu. No ta tur siman ta fasil pa skirbi un blog. Tin blog ku mi a skirbi den 40 minut, tin otro ku a tuma 5 dia. Pero tur mi a skirbi ku un plaser imenso.

Tabata un felisitashon kortiku ku mi manda pa Oompie Stroopie pa ku e pagina di T`aki Mi Ta Beba.com ku a inisia mi partisipashon. Na final mi a puntra ku kiko mi por yuda i mesora e la kontesta: ku skirbi blog!.  Well, challenge accepted.

E tim di TMTB pa final di 2015 ya a skirbi mas ku 215 blog. Un mas bunita ku e otro. I tur dia di nobo un sorpresa pa nos “followers”. Ta hopi ta esnan ku asina nan lanta mainta nan ta lesa un blog prome nan baha foi kama.

  You know who you are.  A big Thank You.

Tirando un bista den e sifranan di e site mi por divulga ku ya nos ta rumbo pa 1 million viewers. E blognan ta yega muchu mas lew ku nos tur por a pensa. No ta pornada nos ta wordu aserka pa diferente kompania i instansia pa forma un alliansa. Keda pendiente paso tin kos bunita na kaminda. E mihor manera pa no perde ningun blog ta di “Like” nos FB page. Korda bisa bo famia, amigu i konosinan ku ainda no a hasi esey.

Personalmente mi no tabata sa kiko mi mester a spera ora mi a kuminsa blog. Loke si mi a realisá for di prinsipio ta ku mi kolega-bloggernan ta bon den nan stòf. Awor ku e TMTB crew a krese, ta mas kos bon so nos followersnan por spera. Pret ta ku ami mes ta un gran follower di e crew. Pa ami tambe e topikonan ta un sorpresa. Tin dia ku mi ta asta blokia mi agenda o ninga invitashon di kolega di trabou pa lunch pa asina mi por lesa.

Inspirashon mi ta saka tur kaminda. Tin biaha ta loke mi ta lesa riba Facebook, otro biaha ta ora nos muchanan ta subi avion bai Hulanda pa studia. Siguente biaha ta selebrashon di 50 aña Singapur o rapport di skol di mi yu. Tin blog ku mi a skirbi na kas, den bus, den taxi, durante fakansi, anochi lat o lanta skirbi marduga prome mi bai traha.

E parti mas dushi di forma parti di TMTB crew ta reakshonan ku nos ta haña. Tantu e mensahenan ku ta enkurashá nos pa sigui i e sugerensianan pa konsiderá un otro punto di bista. Tin blog ku ta pone hopi hende bai bèk den tempu. Otro ta pone nan pensa i asta filosofiá.

Tras di kortina nos ta trahando riba rúbrikanan i ideanan nobo pa 2016 ku mi tin sigur lo bai kai na agrado di nos followersnan.

Danki pa boso sosten den 2015.

Resúmen di siman (44)

Dr. Rolfast ta hasi bofon di pashènt

E trabou di un dòkter ta mas un yamada ku un profeshon. Bo ta traha ora nan largu i hopi bia bo tin mas tantu pashènt ku bo por atendé kuné riba un dia. Ta lógiko ku debes en kuando kansansio por sòru pa iritashon. Konsekuentemente esaki por pone bo atendé esnan ku mester di bo yudansa ku ménos pasenshi. Nos tur ta ser humano ku ta kometé eror.

Loke si ta difísil pa aseptá ta un dòkter ku intenshonalmente o sea pa malu ta keda insultá i provoká su pashèntnan. Sera konosí ku Dr. Rolfast. E tipo aki a ninga di yuda un mucha di 2 aña ku tabata keha hopi di doló di orea. Riba esei e la tribi di chèrcha mayornan di e kriatura aki.  Segun e mama:

Manera e mama mes a bisa. E kos aki ta inkreibel. Ta kon un hende ku a huramentá pa yuda su pashèntnan por hecha un baina di e forma aki? Dr Rolfast laga nos djis rekordá bo un parti di lokual bo a huramentá pe:

“Ik zal ervoor waken dat mijn houding tegenover patiënten niet beïnvloed wordt door levensbeschouwing, politieke overtuiging, sociale stand, ras, etnie, nationaliteit, taal, gender, seksuele voorkeur, leeftijd, ziekte of handicap.

Ik zal het leven en de menselijke waardigheid eerbiedigen.

Zelfs onder druk, zal ik mijn medische kennis niet aanwenden voor praktijken die indruisen tegen de menselijkheid.”

Hippocrates

Tin un dicho ta bisa: “ na Kòrsou i den shelu tur kos por” i ta di e manera ei mes bo ta sinti bo ora algu asina sosodé. Sea Dr. Rolfast ta kambia su manera di atende ku pashènt òf e bai kai sinta riba su mes stethoscope i skucha su bos “interno”

Pueblo ta kuestioná Jandino Asporaat su pelíkula nobo : Bon Bini Holland

Nos a kustumbrá di mira nos mes hendenan bria den programanan di televishon hulandes manera Opgelicht, Opsporingsverzocht i Wie is mijn Vader. Awor ku Jandino Asporaat ke duna un toke kómiko na e bèrgwensa ku  “no me ku no me” ta kousa kier hunga santu i konden’é.

Vários ta esnan ku a mustra nan mal kontentu pa ku su pelíkula indikando ku esaki ta soru pa stigmatisashon di nos hendenan na Hulanda. Un remarke ku a hala nos atenshon ta bisa lo siguiente:

“Inbox bro…. Mi ta poko desgusta

Charmante Oplichter van Curaçao. Mag ik heel even mijn ongenoegen uiten. Jandino Asporaat is een top entertainer…. Applaus, maar waarom kies Jandino Altijd om een Curacaoenaar cq Antillianen neer te zetten voor domme, asociale of Oplichter. Dit vinden we blijkbaar leuk en grappig.

Alle Curaçaose types dat Jandino doet zijn dom, agressief, asociaal en nu ook Oplichter. Kom op man.”

Awor sea Dios a trompeká ku un hèmber di estupides i lag’e plama sin e por a yuda riba sierto hende su kabes òf gewon nos gusta skonde pa e bèrdat.  Loke Jandino a hasi ta simplemente komersialisá e eskases di inteligensia bou di un grupito di nos hendenan. E eskases aki ta pone ku nan mester rekurí na e instinto animal pa komuniká ku otro ser humano lokual hopi biaha ta resultá den agresividat.

Jandino Asporaat ta gana su plaka presentando nos mal komportashon di un manera kómiko na e públiko Hulandes… i abo?

 Despues di dread awor ta kadena (Club Spoonz)

“Spongs”, “Spons”,  “Spoens” “Kuchara”. Tur ta nòmbernan di kariño ku a duna e klup aki ku awor atrobe ta den notisia. E biaha aki no ta kabei di dread ta e tópiko pero bistimentu di kadena riba paña. Un pareha ku a pa bai dibertí nan mes den e klup a konta ku:

“Bon loke ku ta Pasa ta ku ayera nochi ami ku mi parega a sali pa bisita u night club kwal ta e sun asina popular spoonz. Nos ta jega na entrada di e club ami ta drenta mi parega ta drenta huntu ku mii nan ta kontrola ami i mi parega.

Diripeinte un security ta bisa mi parega pa hinka su kaden paden di su t-shirt mi parega desentemente ta sigi e ordu di e sucurity i hinka e saki paden… pero kereindo ku porta ta djis pa kaba hasi e kontrole oke nos ta sigi bai paden i stashona na nos sitio pa disfruta di nos anochii.. despeus di kasiii un ora den e club nos ta para security ta hasii un señal ku mi parega pa hinka e kaden den e t-shirt atrobe ma bisa mi parega pa kiko ta kiko e kos di pantomina aki ku hinka kaden aden…

despeus mnr security ta bolbe bin no serka mi parega awo pero serko ortro hende den nos banda splikando nn ku tin ku hinka e kadeb den e t- shirt of sea den e kamisa..

Splikando tur hende ku nuin hende homber no tin mag di tin kadena saka pafo pone riba nn t- shirt of kamisa e mester ta tapa pande ..paso ta regla nn di doño ku no tin mag wtffff???

Awo mi pregunta ta ?ta dkn no tin mag di tin kadena saka pafo den e club kiko ta pasando ke luga aki mi ta konpronde ta regla pero e reden pa ku e sakii mino por konpronde..

anto kiko ta mas pret e securety ta bisa bo hinke aden ku masha splikashon en zo bira bai nn ta bolbe sake ate ta bolbe bin pa bisa bo hinke aden ainooo anto ku un luga ku 300 hende pa 400 hende hinter anochii bo ta kana hasi e pantomina ei

Club spoonsz nos ta haña bo !
No dread
No smooking
No sneakers on friday
An now …… no mag tin kaden pafo pe homber nn
Anto next no mag di bin pechu afo pe hende muhe…

Peeps ami no sa kiko bosan ta pensa pero mi ta vind e kos aki un poko dimasss awo.”

Tur klup tin nan reglanan di kas. E problema di klup Spoonz ta ku sea no ta informá bishitantenan na un forma efektivo òf simplemente tur siman ta inventá regla nobo. Un kos nos tin di remarká. E fenómeno di bisti kadena bou di hende hòmbernan a bai for di moda for di aña 1998. Konsiderando esaki nos ta uni nos mes ku e biaha aki ku e klup su desishon pa tur hende tene nan kadena bou di nan paña.

Nos kier a hasi un súplika na tur hende hòmber ku ta bisti kadena estilo “koningsketting” i otro atrosidat pa por fabor bende esaki nan i kumpra un bon oloshi, òf un Toyota Vitz.

The Guardian Group ku otro eksitoso Guardian-Loop (Fatum-Loop)

Despues di a organisá e kaminata aki pa mas di 30 biaha sigui e aña aki tambe e la resultá den un éksito rotundo. Manera semper e anochi promé ainda hopi hende tabata subi facebook i puntra ken por tin tishùrt bende nan. Nos a komprondé ku tishùrtnan a wòrdu bende pa asta dòbel di e preis i den un kaso asta a troka dos tayer di un suzuki swift pa un tishùrt sais m.

Riba e ruta mes kosnan a kana bon i nos por a nota vários partisipante ku a kòrta i dòrna nan tishùrt manera kos ku ta baimentu di Jump-in tin. Tin tambe ku a kose 2 tishùrt na otro pa krea un shimis i bisti sapatu hilchi haltu. Kada loko ku nan teima.

Loke si nos no por keda sin kuestioná ta lo siguiente. E mes un esfuerso ku a hasi pa lanta 5 or di mainta riba un djadumingu a kaba na “aros con coco” pa su siguiente dia. Hopi mucha a yega skol lat i dòkternan di kas tabatin man yen ku tur e pedidonan pa karta di AO.

Nos a perde kaminda pa loke realmente ta importante. Tur kos ta drai riba hasimentu di kos pa bista di hende. Klaramente hiba yu skol na tempu i bai traha maske bo ta un tiki kansa no ta kai bou di esei.

 Hagel na Aruba. Bèrdat òf mentira?

Djadumingu último a sosodé algu úniko na nos hermana isla Aruba. Durante di un mal tempu ku a soru pa hopi áwaseru na un momento dado hagel a kuminsá bini abou for di shelu.  Facebook i otro medionan sosial tabata kolma ku potrèt i testimonio di vários persona ku a mira esaki. Servisio di meteorologia no a konfirmá e kaida di hagel pa motibu ku e personal no a mira i tene esaki den nan man. Esei ta pone ku ofisialmente no por bisa ku tabatin kaida di hagel.

E deklarashon aki a kai den masha mal tera bou di esnan ku si a mir’e. Boneiru tambe a tuma nota di loke a sosodé na Aruba. Pa demostrá nan kombibensia a graba e siguiente video:

Apesar di tur kos tòg nos a logra yega djabièrnè. Mayoria hende a kobra i awe lo tin hasimentu di drùk na happy hour.  Si ántes tabata bai happy hour pa dibertí i relahá awendia ta uza e momentu aki pa:

• ‘Netwerk’ buskando pa subi di posishon riba lomba di otro,
• Broma i konta kon karu bo Audi ta i ku bo a kaba di kumpra un kas na Vista Royal

E manera di bisti tambe a kambia. Si ántes bo tabata los dashi, saka kamisa afó i laga bachi den outo awor ta sali trabou bai kas bisti flus bin bèk.

Un set makakeria pa na final drenta outo di 90 mil florin i bai drumi den kas di mayornan òf flèt den kura.

En todo kaso. Nos ta spera ku un biaha mas nos a sabi di deleitá bo ku e susesonan ku na nos pareser tabata bale la pena menshoná i kòrda semper ku maske:

Broertje a kou Milly Ras dje brutu ei ku hagel a kai na Aruba, Mòru Bon Dia tin un decor nobo pero Glenn Thomas si su flus a keda mes chapo i Obispu Luis Secco a kumpli 45 aña komo saserdote pero pastor Simon Wilson ketu bai ta missing in action…

T’aki mi ta BEBA

 

Resúmen di siman (42)

Shofùr di bùs 323 su rishi ta krishi  

E echo ku bo ta un shofùr di bùs no ta niun hende su falta. Sea bo a disidí konsientemente pa ehersé e funshon aki òf sla di bida a pone den dje. Aparte di transportá pasahero tambe bo tin e deber di trata nan ku rèspèt. I netamente e último aki hopi biaha ta laga di deseá. Ta papia malu ku pasahero, toka muzik duru kasi pa hasi bo surdu i manehá komo sifuera ta un parlamentario ku habrimentu di tripa tin sinta den e bùs. Via di Yves Cooper su inbox nos a tuma nota di e siguiente kaso:

“Bonochii meneer…Mi tin un audio aki di un señora di bus num 323 Pero ami ta haña ku esaki no ta manera di papia ku hende, e señora a djis hasi un pregunta… Hopi onbeschoft! Mi no sa si meneer lo por a post esaki riba meneer su wall… Danki.”

E tópiko aki a sòru pa un kantidat grandi di komentario serka Yves su siguidónan. Unu di nan a reakshoná basta rabia a bisando ku:

“Muheeee superr bestia e ta poko dia ei e la bin oostwest bin laba auto kere ku ta e kobrado mester bai ajabou bai kobre awel ma mustre ku te ta baha bin ami no ta su kria e la bin bin zundra awel ami si a pare muhe lokoooo hopiii na lokoooo e ta muhe frustra”

Ora ku mester wèlga pa subi tarifa di bùs a blòkia kareteranan prinsipal di nos sentro di siudat, koba mama i marcha bai te serka minister pa eksigí su atenshon. Awor ta ora pa hasi algu na e kalidat di servisio i vooral na e manera ku ta komuniká ku pasaheronan.

Skucha e siguiente grabashon i konkluí pa bo mes si e shofùr su rishi tabata krishi òf simplemente e tabatin un mal dia.

Ora aña tei kaba tin hòrtamentu di paña

Ya no ta falta mashá pa aña 2015 kaba. Algu ku semper ta lanta kabes den e último lunanan di aña ta kiebro den pakusnan. Den e siman ku a pasa tabatin vários kaso di ladronisia kaminda a bai ku diferente paña i asesorionan for di diferente lugá.

Malechornan kasi semper ta hasi uzo di un outo hòrtá pa kometé nan akto. Ta bon pa investigá si e kasonan aki tin di aber ku e tantísimo fiestanan ku lo mester bai tuma lugá den e temporada benidero. Mester laga doñonan di pakus para na porta di fiesta ku nan mashin di scan. Ku e mashin aki nan por mira mesora si un paña a wòrdu bende òf simplemente e la disparsé.

Nos mester siña mira i laga para i tambe stòp di kumpra kos hòrtá. Hinka man den le sènk.

 

Bululú den tráfiko

Den oranan di mainta nos kareteranan por wòrdu kompará ku un esena for di un pelíkula di guera. Tur hende ke yega promé, ta keda sin duna preferensia, pasamentu den lus kòrá ta tuma lugá sin miserikòrdia i ta pasa den verboden ku un kara labá manera nada no a pasa.

Vários biaha e tipo di komportashon aki ta resultá den aksidente kaminda hendenan inosente ta keda herida. Tambe e asuntu aki por kousa diskushon fuerte ku sa resultá den agreshon formal.  Riba facebook nos a tuma nota di e siguiente suseso ku un persona a pasa aden. Segun e persona aki:

“Mainta trempan no ta orario pa fada mi kabes vooral ku mi tin ora pa perde i sinta chill den auto wa .. abooooo kemen bo ta baha subrino/yu na marnix mavo i lora djei den verboden pa baha abou bek. Ma manda bo bek pami pasa bo KEMEN ku ami mester pasa rondo dibo i sigi bai hollandse bakkerij .. awel dushi awe bo a paga pa tur e kaka nan ku ta lora na chino i pega trafiko paso MI NO A BEK NI MI NO KIER A PASA ROND .. SINJA KORE NA DRECHI DEN TRAFIKO I WAK SI BO TA KORE KAKA MES NOOOOO STROBA OTRO HENDE.. tur hende tin pura awel awee ami NO .. peki a los si WEEFFF (weave) i lipstick su smul ma para wak e gewoonnnn . I alfinal e mester a bek bai chino BEK pami pasa ..tin ora ta laga pasa pero tin dia ta dimassss i awe ta dimas . mi ta kuminsa traha 9or i abo awo ? Lolas”

Riba e potrèt bo por mira kon e dos outonan aki a keda pará mei mei di kaminda te na momentu ku e shofùr ku a kore drenta di verboden a disidí na bati retirada.

Aruba ta hot!

Si tin un isla kaminda ku su paisanonan sa perfektamente kiko mester sosodé riba un bon djamièrdè anto esei ta Aruba. Ta masha happy hour i otro tipo di fiesta tin riba e dia aki. Tur hende ta warda 5 or bati pa nan kuminsá kanta kansionnan manera “hoy se bebe” i “ pasame me la botella”. Lástimamente tin un grupito ku ta gusta brua kos den otro i ta kuminsá festehá for di trempan.

Tuma bon nota: e video aki no ta apto pa muchanan menor di edat. E ta kontené loke ta parse esenanan for di un pelíkula di pornografia grabá na 1950. Den un palabra “Afschuwelijk”.

“Agiws”

Esei ta e denominashon ku desde awor nos lo bai uza pa presentá boso tur sorto di disparate ku ta wòrdu papia riba internèt i por en general facebook. Mas abou ta sigui lokual ku mas a resaltá e siman aki. Den un palabra AGIWS..

E siman aki nos ta mas kòrtiku ku bo a kustumbrá. Trabounan diario a pone ku awe nos a keda debe bo un pida. No preokupá. Otro siman nos tei den gran forma atrobe. Aparte di tur lokual bo a kaba di lesa tin hopi mas kos ku a sosodé. En todo kaso nos a skohe lokual segun nos ta bale la pena kompartí ku bo. Te aki nos ta keda awe pero nos no por bai sin rekordá bo ku maske:

George “Terminator” Jamaloodin probablemente ta lesa resúmen ku un arma outomátiko den su man, a ni misa bo no por bai sin malechornan kibra den bo outo i maske hopi hende a lubidá ketu bai nos SI kier sa ta na unda eksaktamente den kua buraku obispu a manda pastor Simon Wilson bai meditá…

T’aki mi ta BEBA

Resúmen di siman (41)

Nicole “Bonnie” Lake ta bèk na G.O.G.

Esaki despues ku un biaha mas e la logra skapa for di e instituto. Nicolle su historia ta unu hopi tristu ku a kuminsá for 21 di febrüari 2013. E dia ei e la kue pleitu ku su mama i bai for di kas. No a dura muchu ku a gar’e. Dia 28 di ougùstùs 2014 a trasladá Nicole pa Huize Rose Pelletier. Na su yegada e la saka un kareda kore limpi bai laga e personal.

Durante e temporada ku e la keda komo fugitivo di lei Nicole a hasi vários deklarashon via di facebook bisando entre otro ku:

“Nicole Lake

15 hrs ·

Fuck cops bosnan bai traha basti manda mensaje ku koi mariku pami”

“Remove

Nicole Lake Nan mag bin wak mi pero si nan logra keda bibu te pa nan bai kumi te kos

14 hrs · Like”

Den 2015 Nicole a bolbe hui un par di biaha i durante di e penúltimo biaha e la forma parti di un grupo ku tabata tira atrako.

Si bo ke bo tuma nos na malu pero Nicole Lake ta un spil di nos komunidat. Na promé lugá mester wak ta kiko tin tras di tur e aktonan aki. Ta imposibel ku un hobensita di 14 aña ta lanta bisa ku desde awe e ta bai hiba un bida parotin kometiendo aktonan deskabeyá i kriminal. United Nations a proklamá 20 di novèmber komo dia internashonal pa derechi di mucha. E derechinan mas importante ta:

• Derechi riba edukashon
• Derechi riba kultura i religion propio
• Derechi riba un nòmber i nashonalidat
• Derechi riba un opinion propio
• Derechi riba protekshon i un bida salú
• Derechi riba protekshon kontra di maltrato i violensia
• Derechi riba protekshon den kaso di un guera
• Derechi riba kuido médiko
• Derechi di krese serka su famia

Aparte di tur esaki Unesco ta lubidá ku tur mucha tambe tin deber…

Komo mucha bo tin entre otro e deber di:

• Habri orea skucha ora bo mayornan ta papia ku bo
• Sera bo boka den klas ya asina bo por komprondé loke e dosente ta splikando
• Evitá tur komportashon ku por hiba bo den krili bo wela na grandi
• Alehá bo mes di mal amigu/amiga
• Aseptá lokual bo mayornan por kumpra pa bo i no keda yora mara hende pa “Aifoon”

En fin. Nicole ta bèk kaminda e mester ta. Ban spera ku e lo kambia su komportashon promé ku ta lat.

John de Haseth miembro di PPA malamente gará “haciendo cosnan vies banda di beachnan publico”

Segun e periodista Nelson Speed Andrade e konosido politiko di PPA John de Haseth a hasi su mes kulpabel di aktonan inmoral na un luga publico. Nelson a konta ku:

“Esaki ta John de Haseth haciendo cosnan vies banda di beachnan publico. Tur dia e ta yama radio insulta tur hende den forma baho pa tur cos. Un gran sinberguensa cu debe cantidad hende. Un hende cu boca hopi sushi. Wak con a gare ta haci cosnan vies riba beach. Masturba y purba tira man riba cos di guynan jong na beach. Dialuna sigur ainda lo bo tende grita ofende hende. Ata pa tur hende mira kende ta e miembro di Grupo di 7 cu ta haci cosnan vies riba beachnan di Aruba den oranan di anochi. No ta cos cu mi kier publica pero mirando con baho e ta lastra hende tur dia via radionan sin ningun prueba, ata un prueba pa tur hende mira. Spera cu esaki e siña su les. Haci bo cosnan personal y vies na bo cas.”

No komprondé nos malu. Ku ta hòmber John gusta esei ta su asuntu. E problema ta sintá na e manera ku e ta purba di sasia su set. A ni den e mundu di animal e kosnan no ta kana di tal sistema.

Riba e siguiente video por mira klaramente kon John ta baha su karson i kometé semehante atrosidat. Nos ta konsehá un i tur ku tin un stoma delikado pa no mir’e.

Afpakteam formá pa O.M. i KPC a kuminsá ku nan trabou

Ta basta luna pasá O.M. a taha boso tur. Nan a anunsiá ku lo bai kita tur plaka, propiedat i otro artíkulo ku a wòrdu kumpra ku plaka prosedente di benta di droga òf otro aktonan kontra di lei.  Ya kaba nan a kita vários outo luho, kasnan grandi, un kantidat di tete i atras falsu i asta dos djente di oro for di vários persona.

Tambe a bai na vários adrès i konfiská un gran kantidat di weave humano brazilian, indian di tantu e vershon standart komo esun ku ta wòrdu uza pa laser. Na sierto adrès a hasta logra konfiská tasnan di marka i un kaha di te marka Badia.

Tur esaki tin komo konsekuensia ku fin di aña aki probablemente diferente fiesta i otro aktividat lo ta ménos bishita kompará ku añanan anterior. Laga nos ta sinsero ku otro. Nos ekonomia kon ku bo mir’e ta drai pa un parti riba plaka ku ta bini di aktonan kriminal. Dealer di vehíkulonan di plaser, promotor di fiesta, joyería, diskotèk, lugá di hür outo etc. tur lo  bai sinti e efekto negativo di e akshon aki. Tur outo, bròmer, jet ski, karchi di fiesta VIP, bòter nan di bibida etc lo keda para kue stòf. No ta ke no ke gasta plaka pero ta tin no tin plaka pa gasta mas.

Un grupo ku tambe lo haña un sla formal ta e asina yama goldigger-crews. E “crews” nan aki ku ta wòrdu forma tantu dor di hende muhé komo hende hòmber. Nan komportashon por wòrdu kompará komo esun di un karpata. Tur loke ta move i tin sanger (i den e kuadro aki plaka) lo ser ataká.

Na fin di novèmber lo bai tin e promé fiesta kaminda lo por midi ki efekto e Afpakteam di bèrdat tin riba farándula i nightlife di Kòrsou. Ta trata aki di All in White goes Red. Nos lo mira ken ainda por “make it rain” i ken ta “out of the game” pa motibu ku O.M. a laga nan mal di “drain”.

Alex “Bambi” Rosaria ke nombra biná di Korsou animal ofishal

Esun ku hinka den su kabes ku Kòrsou su polítikonan ta hopi okupá ku adelanto di nos pais ta kompletamente robes. Señor Rosaria ta hopi lew for loke realmente nos pueblo tin mester. Riba website di su partido nos a bin topa lo siguiente:

“Lider di Frakshon pa Partido PAIS a manda un karta pa minister Dick pa pidi esaki informashon tokante di nos animalnan protehá ya ku e leinan aki ta data di mas ku 80 aña pasá. Tambe Rosaria ta pidi pa hasi e biná di Kòrsou (Odocoileus virginianus curassavicus) komo e animal ofishal di nos pais.”

Si Alex Rosaria kier e mag hasi a biná di Kòrsou maskota di su partido. Nan tin basta tempu ta kore duru pa nan responsabilidat tòg. E biná lo karga e nòmber:

“Partidus Swakus Corehopidurus Patraboucus Papueblus”

Me doy.

“Agiws”

Esei ta e denominashon ku desde awor nos lo bai uza pa presentá boso tur sorto di disparate ku ta wòrdu papia riba internèt i por en general facebook. Mas abou ta sigui lokual ku mas a resalta e siman aki. Den un palabra AGIWS..

Insel Air vs Avior (Bòmbòshi den laria)

Ademas di soru pa vuelonan sali segun skema e personal di Insel Air tin hopi mas talento. Nan ta dominá vários idioma i esei bo por skucha klaramente den e siguiente grabashon. Ta trata aki di un diskushon entre pilotonan di tantu Insel Air komo Avior. E motibu no ta konosí pero bo ta skucha si kon kada unu ta defendé nan kurpa firmemente.

Awe ya ta 9 di òktober 2015. Kiko bo a logra den e siman ku ta kabando ? Bo tambe a pèrdè jet ski, bròmer i weave ? En todo kaso. Awe tambe tin Regatta na Boneiru i esei mes ta e motibu pa kua for di awor nos ta despedí di bo pero kòrda semper ku maske:

Den konseho di minister a vota unánimemente pa no selebrá e promé lustro di pais Kòrsou,  Aubrey Janga su reportahenan a kuminsá parse esnan di e programa “Ocurio Asi” i segun señor Werner  Wiels mester kuminsá traha flèt purá paso kos tei drecha…

T’aki mi ta BEBA

Resúmen di siman (38)

Olivier Arrindell vs Gobièrnu, Radio Dirèkt, i korant Èkstra

Ta generalmente konosí ku e proseso rondó di hañamentu di pèrmit por kosta bo un igra, nir òf matris. Hopi ta esnan ku dia den dia afó mester keda yora, sklama puntra i hasta tin bes chupa pa nan por bin kla. Otro nan ta kue fadá i kuminsá operá sin e pèrmitnan nesesario. Ava Airways ta un bon ehèmpel di kon kosnan por bai kompletamente robes.

Nan tin kasi 2 aña wardando riba un kontesta di parti di gobièrnu. Segun representantenan di Ava Airways, Olivier Arrindell i Giovanni Atalita e úniko kos ku nan ke tende di gobièrnu ta “Si” òf un “No”. Na lugá di hasi esei ta preferá di keda ketu i ignorá nan persona. Ora kos a kuminsá bira kayente gobièrnu a kontesta ku pa trata e petishon di pèrmit mester sòru promé pa un garantia na balor di 48 mion dòler. I ta aki Colon, Sambil Zuikermall a kima.

  

E situashon a bira mas pió ora ku mikrofonistanan di Radio Dirèkt a kai den e asuntu aki. Laga nos ser sinsero ku otro. Un pais ku su gobièrnu ta tuma kasi dos aña pa djis bisa “Si” òf “No” ta un pais kanando wowo sera den direkshon di un abismo. Kuantu esfuerso ta kosta pa duna un kontesta? Lo por a evitá tur e bululú ku awe ta tópiko di dia. Mundu kompletu ta wak nos i hari.

Danki Dios e problemanan rondó di e asuntu aki tambe ta sòru pa hopi harimentu. Entre otro Olivier a regala Richeron ‘Dem a Bleach’ Balentien un bòter di kloròks i tambe e la batisá dos buriku dunando nan nòmber nobo (Liesjeron i Djèzzzmin). Tambe e la mustra prueba di un kombersashon masha ameno ku e tabata tin ku Anthony Pieter di korant èkstra. En fin nos ta harma e sirko i boso ta kordialmente invitá pa disfrutá di e show.

Un Kòrsou Hustu un otro desgustu ?

Despues di 25 aña den polítika Omayra Leeflang a lansa su mes partido. Segun tradishon tur partido polítiko ta wòrdu rekonosé na nan koló. Un Kòrsou Hustu lo karga e koló lila. Un grupo basta grandi tabata presente riba e dia di inougurashon. Diferente persona a hiba palabra dunando e partido su motibu di eksistensia. Na final por a dal dos beter i kombersá.

Otro aña tin elekshon i no ta nada straño ku den pitu tin partidonan nobo ta nase. Konsiderando kon kos a kana e último 5 añanan aki tin hende ku ta asta papia di un alivio. Ban mira kiko Un Kòrsou Hustu tin aden. Kòrsou meresé lidernan kapas pa hiba nos dilanti. Hende nan hóben, bon studia, ku gana di traha i sin interes propio.Bo mes por komprondé e ora ei ku e tipo di hende nan ei hamas de los hamases lo mete ku polítika konsiderando e situashon aktual.

Ta un manera so tin pa pone un paro na e kataklismo ku nos ta den. No vota mas pa ningun partido ku a hecha baina. Si asina mes. Niun i ningun. Tambe nos mester stòp di laga kos pòrnada susha nos mente.

Shantyskeer unda mi 320 euro a keda alweer ?

E mundu di kabei falsu ta unu kaminda hopi plaka ta lora. Pa un pida “band” di kabei bo por paga mas di 200 florin. Imaginá bo si bo kabes ta hopi grandi ta kon lo bo hasi. Ms. Belly Maduro ta un damita hopi konosí pa tur esnan ku ta gusta kabei falsu. E ta duna entre otro servisio di saka sla, kambia zeta, “frangbel” i “shokeshorber” ora ta trata di kabei falsu. Hopi hende muhé ta drenta kabes tur komé i sali manera promé finalista di Miss Universe.

Ms. Belly Maduro bon konfiá a laga Shantyskeer bin hasi kabei na su kas keriendo ku e lo haña su plaka mesora. Kos a kana otro te ku Ms Belly a fada i pone su relato riba facebook pa tur hende lesa.

Segun Ms. Belly Maduro

 “Nunka mino a pensa ku lo mi mester buta un kliente su kara riba facebook paso ela bin hasi kabei sali mi kas SIN PAGAMI y tur bia e bisa ku eta bin trese mi sen PERO SEMPER tin algu ta komt daarvoor ku eno por bini pagami.. Ora ami bise ku mi mes tin auto mi ta bin tume te unda e ta e ta bira traha kalke smoes.. Ami ta traha hopi duru pami sen y niun persona sinberguensa ta kere ku ta burla dimi..

Lang verhaal: e juffrouw ribe potret aki jama Shanty,,ku kual porsierto e potret nan aki ta ku mi lacewig buta anto ela BIN HASI KABEI SIN PAGA!!!
Shanty a bini hasi kabei serka mi dia 12Aug ’15 prome ku ela jega pa su afspraak ela lagami sa ku un familiar di dje a manda e pago riba mi rekening kaba..
Ami bon konfia ma lage drenta mi luga pe sinta hasi kabei.. Kaba mi ta bise lagami wak e bewijs van betaling mi ta mira ku falta net 1 sifra di mi rekening nummer.. Eynan kaba mi ta sa ku algu no ta klop,,paso bo no por kompleta un transakshon anto falta un number di kuenta.. E banko mes ta bisabu pabo verifika e number paso eno ta bon.. Enfin, Shanty aki a bisami e pago a bai riba otro rekening, keriendo ku ta Lolin Farandulin ta para su dilanti,, anto ku eerst volgende dag ku e pago no ta riba mi rekening e mes lo bin trese pami..
Siguente dia mi a hanja pago di tur sobra kliente ku a bestel algu serka mi pero net di Shanty no. Ma kontakt e, e di kumi ku warda e bel e familiar di dje ku a manda e pago pa asina e bise ku e pago no a pasa y pa bolbe pase riba su mes kuenta asina e mes por pagami. Ma laga algun dia pasa bai y ainda nada. Shanty ku hopi kurashi a asta puntrami pa un otro afspraak pa penja anto asina eta pagami cash tur kos mesora, ma dune un afspraak paso ami ta mi sen mi mester, KOS KU MA VERWACHT ta ku e siguente afspraak ku ma dune pa dia 20Aug eno a kom e na tampoko..
Ami mester a app e, ora ku ma mira eno a jega pa su afspraak, pa puntre kon lew eta y Shanty aki ta bin bisami e ta bai kai laat trobe eno ta bai haal pa bin penja.

Ja aki ma sospecha ku e juffrouw ki ta blo bashi,, kaminda ela papia jen kos ku e tin jen sen eta bai largu ku vakantie dit dat, ela opera body saka jen sen blablabal.. Pero tog bo debemi 320€!!!!
E peluka ta kosta 285€,, anto door ku eno tin kabei (kabes limpi) ma kobre 35€ pa bute..

Enfin awe ta hasi 1 luna kaba ku eno a pagami ainda y kada bes mi puntre etin un smoesje,, ku eno ta na rotterdam eta lew anto lastu a bin hasi zielig bisami ku ela hanja problema ku e familiar pesey eno a logra pagami ainda ( esey no ta mi problema) BO NO MESTER A HUNGA GRANDI BIN HASI KABEI SI BO TA BLO BASHI..
Ma bisa Shanty hopi bes ku mi mes ta bin tuma e pago pero kada bes e tin un smoesje.. Siman pasa ultimo ey ma app e bise ku mi ta dune te ku djamars pa pagami.. Ela ignora hasi stoer wel ami no ta esun ku ta pasa berguensa sino e mes.. E mes a hinka su kurpa den e situashon aki..
DIA BO PAGAMI MI 320€ MI LO KITA E POST AKI FOI FACEBOOK!!!!

Anto mi tin prueba (screenshot) di tur e app nan kon Shanty aki ta keda birami pa paga y hasi stoer tambe,,hopi lef y berguensa bo mester tin.. Manda pic ku video mustra pari euro,,kaminda bon por pagami te ainda.. Mi ta traha hopi duru pami sen y niun pero niun hende unta bin tumami hasi..

Anto si ta nesesario lo mi post algun screenshot di tur e 4 siman nan ku Shanty ta bira pa paga.

Kimskeer a bira shantyskeer

Un feliz dia verder

 

Ban mira Shantyskeer awor si a yega ora pa paga òf entrega e kabeinan bèk i kana manera spanta para.

E siman aki tempu a bai laga nos. Kuminsando for di otro siman e resúmen lo konsistí solamente di items nan ku ABO lo ke mira. E por ta un notisia pero tambe algu kubo mes persona a pasa aden. Pa hasi esaki ta masha fásil. Djis tuma kontakto ku nos via di facebook òf pa medio di e paginá di kontakto riba nos website www.takimitabeba.com. Bo item mester konsistí di entre 250 pa 300 palabra na e idioma ku abo mes ta deseá. Nos ta masha interesá pa sa kiko tur boso ta eksperensia durante di siman. Nos lo no divulgá bo nòmber sin bo pèrmit.

Aunke bo no a kobra awe, tòg ta djabièrnè. Ta di koba saka bleki di tuna ku ta hole kakalaka, herebé e ham ku bo tin for di aña pasa den frizer i koba den tur lachi wak si tin sèn largá pa sera kumpra gasolin.

En todo kaso. Laga nos despedí di bo rekordando bo ku maske:

E siman aki resúmen tabata kòrtiku, den Kaya Kiwa un tipo a kòrta su “brasa di beibi” zuai den kura i Ivar Asjes Jasjes Credit Pasasjes a yega Vatikano promé ku Pastor Simon…

T’aki mi ta BEBA

E siman aki atrobe nos ta presentá bo un reseta fásil i ku no ta rekerí ingredientenan karu.

Kuki di ‘Pinda’
Ingredientenan:

1 kòpi di pindakas

1 kòpi di suku

1 kòpi di suku brùin

1 kòpi di res

1 telep di baking powder

1 telep di salu

1 telep di vania

2 webu

3 kòpi di ariña di pan

Preparashon :

Den un kòmchi nos ta pone tur e ingredientenan huntu. Ku un mekser òf kuchara di palu nos ta meskla nan tur bon den otro. Ora e meskla ta kla nos ta kohe un plancha hunta esaki bon ku res i ta stroi un tiki ariña di pan riba dje. E fòrnu tambe nos ta sende entre tantu na 350 grado. Ku un kuchara nos ta saka for di e meskla i forma e kukinan i pone nan den e plancha. Por stroi algun pipita di kolo ariba pa e por keda un tiki mas bunita. Ora ta kla ta pone e kukinan pa 10 pa 15 minüt den fòrnu. Ora nan ta kla nan ta baha bon ku un bon kòpi di te.

Resúmen di siman (34)

1. E bon yu’i Kòrsou ta kore outo na un manera responsabel. Ora e ta den ‘bebouwde kom’ e ta baha spit i keda alerta pa por ehèmpel muchanan òf kachó ku krusa kaya direpente. Lamentablemente den e kaso di Chuchu kosnan a bai otro. Na un edat hopi yòn e la keda ranka for di e mundu aki. Un outomobilista iresponsabel a pasa dal e dilanti di su porta di kas na Granadiersweg sin sikiera bira wak patras. Chuchu a keda benta riba kaya kaminda e la bin fayesé pa motibu di e heridanan ku e la sufri.

Famianan di e defuntu tabata hopi rabiá i a bisa entre otro ku:

“mi no por kere ku existi gente malu sin corazón asína, mi no ta comprende kon nan por drumi anochi, si e persona ta lesando esaki, mi ke pa e sa tur e sufrimiento y tristesa ku e a laga den nos corazón, nos ta hanja disgusting ku hende mane e ta kana den mundo”

 “BO A DAL MATA UN MIEMBRO DI NOS FAMILIA ANTO BO A CORRE BAI MANE TA BASURA BO A DAL … Warda trankil pasombra karma ta bin pa bo!”

Ta hopi duru pa pèrdè bo bestia di kas ku tantu bo ta stima. Si bo mira kon hende ta trata otro anto lo bo no keda strañá di mira nan trata bestia di e forma aki.

En todo kaso. Yamando e tipo di  hendenan aki bestia ta un insulto pa e bestianan di bèrdat.

2. Coraline Kooistra ta direktora di Stichting Tegen Kindermishandeling – Advies en Meldpunt. Meta di e fundashon aki ta pa duna konseho, tuma keho, hasi intermediashon i ofresé ayudo na víktima. Ku hopi amor i pasenshi e ta hasi e trabou aki.

Mayoria hende no sa, pero keda sin paga plaka di alimentashon p’abo yu tambe ta un tipo di abuzu. Corah ta atendé tur dia ku tipo di kasonan asin’aki i lógikamente su kana sa yena.

Esei ta loke netamente a sosodé durante di siman i pa medio di su Facebook e la splika ku:

“Awe mi ke ta un poko mas direkto ku normal. Na tur e hòmbernan riba Facebook ku ta blo ta pone versíkulonan di Beibel i foto di nan outo, i foto di nan fakansi, ku mi sa i ku nan sa ku mi sa, boso por pleassseee bai alimentá boso yunan? Nan ta warda boso pa buska nan i pasa tempu ku nan. Danki i felis dia.”

Corah su mensahe ta mas kla ku di dia. Bo ta preferá di gasta plaka na:

• Tatuahe rònt bo kurpa
• Muhénan marka “ hunga pa fia” pero ta bo so a “hunga pa tuma”
• Sigá, bòter di bebida i brel di solo karu pa broma den fiesta
• Outo nobo lagando e prijskaartje ta kologá pa tur hende mira

en bes di kòrda riba bo responsabilidat komo tata. Un saludo pa tur e muhénan ku tin algu ku un hòmber ku no ta kria su yunan. Masha danki pa sigui hinka e komunidat aki un tiki mas den krili di su wela. Komo muestra di apresio nos ke regalá boso e batata aki. Hasi bon uzo di dje.

3. Un bebida típiko di nos isla ta awa di lamunchi. E ta baha refreskante i ta yuda hopi bon den temporada di kalor. Si ántes tabata duna mucha esaki bebe ora plaka pa kumpra Tang, Sun Quick i Tip Top kaba awor e ta un bebida luho. Mayoria establesimentu ta bende esaki na un preis basta pika.

Nan ta huzga ku ta trata aki di un produkto natural ku ta tuma hopi tempu pa por prosesá. Mester subi palu kita lamunchi, kòrta i primi esaki nan pa finalmente bo tin e ekstrakto ku por wòrdu bendé.

Pa karu ku e ta semper bo tin e opshon di keda sin kumpr’é. En bes di puntra e preis pa un glas nos ta preferá di laga orguyo hinka nos den kataklismo. Ta ora ku e kuenta yega nos ke rabia, sulfurá i manda potrèt pa Yves Genghis Khan Cooper pone riba su Facebook. Riba e mundu aki nada no ta pareu. Bo a kore yega den bo “esjuvie” , habraká un kuminda i bebe awa di lamunchi haragan manera mucha ku a kore hunga bala den solo. Awor ku e ora di paga a yega si ta kore rabia paso un glas di awa di lamunchi ta nafl. 7,50.

Awèl drechi pa bo shon. Saka bo pòtmòni di Gucci, paga i bai planta palu di lamunchi den bo kura di kas.

4. Alex Rosaria ta miembro di Parlamento i lider di koalishon pa partido Pais. E chèns ta grandi ku e nòmber aki no ta bisa bo masha. No sinti bo malu pa esei paso ta un echo ku kasi nunka bo ta tende algu di e mener aki. Ni malu ni bon. E último biaha ku a skucha algu for di su boka tabata e momentu ku e la pidi su bodyguard pa defendé di un manifestante ku kier a bis’e algu durante un manifestashon na Bándabou.

Den transkurso di siman a surgi e rumor ku Alex Rosaria a dal abou manera patia bèrdè despues di a baila dos piesa durante un happy hour na Tutu Tango. E lo tabata bou di su awa i na final ta dos bodyguard a yud’é lanta i kana bai outo.

Fantástiko, great, hopi bon Alex. Danki pa laga e pueblo mira na kiko su plaka ta wòrdu gastá. Bo por a sikiera invitá poko di esnan ku soketemente a vota p’abo awe por tin e luho di baila malu, bebe fuma i dal abou. Ta mihó bo a bebe awa di lamunchi.

Naturalmente kosnan asin’aki tin nos pueblo fadá. Si bo tambe ta un di esnan ku ta konsiente ku asina aki no por sigui, mi ta sugirí bo pa tira un bista riba e página di Facebook aki.

5. E último biaha ku a subi O.B tabata den mei di 2013. E tempu ei minister Jardim a sòru pa O.B a subi di 6 porshento pa 9 porshento. Grandi tabata nos sorpresa ora ku e siman aki e mes un minister a anunsiá un proposishon pa bolbe subi e tarifa di O.B di 9 pa 11 porshento riba sierto produktonan.

Ta kuantu medida mas e pueblo aki por soportá ? Paso ta ei tur kos ta keda segun hopi hende: na medida. E plaka èkstra ku ta drenta ta na kiko e ta wòrdu gastá ?

Ketu bai:

• Nos kamindanan ta kibrá
• Skolnan falta material pa duna lès
• Huma di Isla tin nos choka
• Lista largu di hende wardando riba un kas

Laga nos komprondé otro bon. Loke nos ta pidi ta klaridat. Minister Jardim por fabor splika e pueblo mansu aki kon bin despues di dos aña ke bolbe subi tarifa di O.B i kiko ke logra ku esaki. Si tin espasio pa sugerensia nos lo tin gana di mira un subida e tarifa di O.B pa produktonan manera:

• Bòter di shampaña
• Sigá
• Djente di oro
• Kabei falsu
• Karchi di fiesta

i tur sobra produkto pa hasi kos di “bon bida”.

Asina nos a bolbe yega na e dia ku mas nos pueblo ta stima: dja(m)ièrdè. E dia nan aki ta hasi un kalor insoportabel i ta obvio ku nos ta den temporada di orkan. Tormenta tropikal Danny probablemente lo pasa serka di nos islanan na komienso di otro siman. Ta premirá ku pa e momentu ei Danny lo ta un orkan di kategoria 1. Laga nos no drenta pániko. No tin mester di kumpra tur bleki di lechi, pèmper, kaha di galiña, saku di aros i kaha di serbes ku tin den supermarket.

Loke si ta bon pa hasi ta kontrolá si tur eternit riba bo dak ta hinte, bo weave nan ta bon wantá i ku den kura no tin artefaktonan ku por lanta vuelo i kousa daño na bo propiedat òf di otro hende.

Nos ta despedí di bo deseando bo un felis fin di siman pero kòrda ku maske:

Faltando 12 dia promé ku CNSJF ranka sali vários ta esnan ku ta bendiendo nan karchinan pa por paga seguro di outo, promé minister Ivar Asjes a laga sa ku “Ami no mester di politika pa mi biba” i e asuntu di Pastor Simon a manera muri un morto natural…

T’aki mi ta BEBA

Nos ta dediká e reseta di awe na tur miembro di partido Pais. Laga nos sa kon e la baha.

Bolo Borracho

Ingredientenan:

1 liber di manteka 1 liber di ariña di pan 1 liber di suku blanku 9 webu 1 bleki di lechi chikí 1 kuchara di kome kuné di Baking Powder 2 paki muisjes 1 bleki di slagroom 1 telep di esensia di almendra ¼ kùp di anis òf ròm 2½ paki di pudin di vania Algun chèri

Preparashon:

Primeramente ta bati e manteka i e suku bon, despues e webunan i ta brua nan den otro. Bati nan bon den otro y poko poko ta agregá ariña di pan, baking powder, esensia di almendra i brua tur kos bon den otro. Ora ku e meskla ta bon bati ta poné den un forma huntá ku res òf manteka den fòrnu na 375 grado pa mas o ménos un ora. Awor nos ta traha e pudin i lag’é para. Ora e bolo ta kla ta sake for di fòrnu i lag’é fria, pa despues korte den tres laag. Nos ta pone e parti abou dje bolo den un forma rondó i muhé ku bibida. Seguidamente ta pone e pudin, poko muisjes, e slagroom, i ta sigui asina te na e último laag. Ora ta kla ta dòrna e bolo ku muisjes i chèri i pone den frizer.

Resúmen di siman (33)

1. Club Spoonz ta ninga Charyn Muzo entrada. Djabièrnè último Charyn i un amiga a plania pa bai dibertí nan mes na e klup aki. Grandi tabata nan sorpresa ora ku na porta a ninga un di nan entrada pa motibu ku un di nan su kabei tabata estilo ‘dreadlocks’. E bewaker na porta a splika ku gerensia no ta permití personanan ku kabei di dread ni tampoko maton den nan klup.

E damanan a keda mashá desapuntá i tristu komokiera ku e anochi a dòl pa hinter e grupo ku nan tabata forma parti di dje. Nan ta haña tristu kon den un tempu moderno ketu bai ta diskriminá a base di un hende su aparensia. Tambe nan ta puntra nan mes si artistanan ku tin kabei di dread manera Rasta Lè i Amos Balentin lo wòrdu tratá di mesun sistema.

Naturalmente e suseso aki a kapta atenshon di hopi hende ku entre otro a bisa ku:

“ban serio ruman nn! Kiko a pasa ku kabei natural? nn no ta konta? ta 15 kilo di wave mi mester tin pa drenta Spoonz? ki koi loko? ami ta tene dimi nn, penja nn nechi serka Lau Lacle Inesia mantene nn…payasada…”

“E echo ta ku ta doño ta disidi su reglanan. Esun ku no gusta mester get. Peroooooo loke mi no ta hanja great di e doño ta ku el a deskrimina na momentu ku e laga un tokado ku dread drenta i un otro persona ku dread no. Si ta su regla ku e tin derechi di pone den su luga ta OK”

“……………………………………………..! Ojala e motibu ku tin pa tene hende ku dread afo ta aseptable. Mjn dios ke ku un guy kabes limpi pone dou dou den spoonz ma pompa orey??!! Archel Calister SOS aki banda ki..!”

Naturalmente gerensia di klup Kuchara a hasi uzo di nan derechi di opinion i entre otro a splika ku:

“HENDE KU DREAD POR DRENTA PERO basta eta kumpli ku nan reglanan. I si nos kwe AMOS,BORREL,LANDRIE manera a trese dilanti semper nan dreadnan ta nechi,limpi i bunita i tambe hasi. I nunka nan ni otronan ku tatin dread tabata tin problema pa drenta Spoonz.” 

Den 2015 esaki ta kontesta di un gerensia. Charyn masha despensa pero na fini manera e hendenan aki ke bisa bo ku bo kabei ta mahos, shushi i mal hasí.  Nos si ta haña bo kabei una bellesa pero pa Club Spoonz si…

Bo no ta Rasta su Miss.

2. Blac Chynna ta nòmber artístiko di e American urban hip hop model ku wikènt pasá tabata di bishita na Kòrsou. E damita aki a keda kontratá pa hasi akto di presensia na e famoso All in White Pool Party. E fiesta aki den un tempu kòrtiku a bira hopi popular no solamente debí na e bon músika i ambiente pero tambe pa e echo ku semper tin artistanan/modelonan internashonal presente.

Aparte di esei pa 5 ora largu bo por sinti bo un VIP lubidando ku:

• Bo a uza e sèn di unifòrm di skol pa kumpra karchi di fiesta
• E luna aki bo a salta pago di e outo pa bo sinta na mesa di VIP
• Falta dos siman pa bo kobra kier men ta pan ku suku te fin di luna
• A ni misa lo no por haña nan 10 porshento e luna aki

Ta un lástima ku mester paga un damita asina tantu plaka pa e djis presentá na un fiesta siendo ku e úniko kos ku no ta falsu na su kurpa ta e ‘kuiltjes’ nan na su kara. E parti di mas tristu ta esnan ku ta paga asina tantu plaka pa mir’é. Nos isla ta yen di muhénan bunita ku tin muchu mas mihó kurpa i bunita kara ku Blac Chynna. Djis tira un bista riba e potrètnan. Banda di nos muhénan krioyo Blac Chynna a keda mes kos ku un transseksual ku un siruhano fuma a operá. Segun un testigu su weave tabata grita “Goldie, Goldie!!” i su atras tabata parse esun di un abeha drogá.

Un remarke si nos tin riba nos mes hendenan. Ta parse ku kada bes damitanan ta skohe pa bisti ménos paña na momentu di asistí na e fiesta aki. Si biaha pasa shòrtnan den kil i shimisnan kòrtiku tabata skeiru, e biaha aki trahenan yen di buraku a dominá. Tin tabata bunita akabá pero tambe nos a mira hopi di nan ku tabata parse paña ku a para hopi den kashi i ku djaka a kou.

Algu otro mas ta fenómeno di hinka silicon den pechu i atras ku ta bastante popular awendia. Nos no tin nada kontra di esaki pero por fabor hasié na un klínika kaminda tin siruhanonan kapasitá. Riba vários potrèt nos a mira atras nan di sak pió ku outo sin “shòkeshòrber” i tambe pechunan di blas kousando peliger di eksploshon.

En fin. Despues di Lira Galore, Tasz Angels i Blac Chynna dia 28 di ougùstùs awor Royalty Mason, MariaJade i MontanaFierce lo ta na Kòrsou pa chupa boso plaka i despues laga lastra.

Nos ta topa otro riba potrèt.

3. Segun Runny Calmera presidente di Association of Dutch Caribbean Economists nos Isla ta na kaminda pa bira un ekonomia di “Judeska”. Segun Calmera:

“We weten niet wat we doen, waarom we er zijn en wie we moeten helpen. De klant zal zijn hamburger *kip* nooit krijgen, aldus Caldera.”

 Den e delaster 10 añanan ku a pasa nos ekonomia a krese ku solamente 0,5 porshento i e delaster 3 añanan nos por papia hasta di un stagnashon. Pa esun ku no ta komprondé loke nos a kaba di skibi:

“Nos isla su ekonomia ta bayendo ku spit di Churandy Martina den krili su wela”

Esaki ta e bèrdat seku manera ora mucha dal otro ku tera den boka. Loke tur hende kier sa ta ken a hinka nos den e baina aki ? Akaso ta e gobièrnunan di delaster 10 aña ? òf ta nos mes ku pa motibu di interes propio ta keda sin duna e aporte nesesario ?

Nos mester ban bek na e base i esei ta e kalidat di enseñansa pa nos hóbennan. Si esaki ta na un nivel mediokre nos lo forma un komunidat idiota ku outomátikamente lo resultá den un ekonomia desbalansá. E por ta zona duru pero pa nos ekonomia bira salú tambe nos mester stòp di duna kasá, baisait i amigunan inkapasitá posishonnan klave den nos komunidat. Nos isla ta pèsta ku bendedó di cd ilegal sintá den komisariado di gobièrnu i tambe bendedó di tas ku a korona nan mes komo periodista.

Kòrsou su ekonomia a para bira un wega di Monopoly: tur hende ta wak solamente nan propio interes.

4. Téknikonan di CIS i Aqualectra ta wòrdu menasá ku arma di kandela. Wikènt pasá téknikonan mester a atendé un storing na un kas riba Seru di Papaya. Na momentu ku nan a yega un tipo a bula sali manera “El Chapulin Colorado” i saka un arma di kandela. Rápidamente e téknikonan aki a bati retirada i yama polis ku a tarda pa presentá.

Klientenan di e bario menshoná a keda te ku siguiente dia sin koriente pa motibu ku niun tékniko no kier a bai atendé ku e storing konsiderando loke a pasa e dia anterior. Ta kèns nos a bira den e pais aki? Ta tur kos ku ta move nos mester tira atrako riba dje? Nos no ta pensa mas òf ta dje desesperá ei kriminalnan a bira?

Ta kiko lo bo por kita for di un tékniko di Aqualectra òf CIS? E úniko kos ku nos por kai ariba ta:

• Bòn di 18 florin pa kumpra kuminda na chines òf restorant di fastfood
• Portofon
• Hèrmènt
• Pikòp di trabou

Ta parse ku kriminalnan su nivel di inteligensia kada bia ta laga di deseá. Bo ta riska bo libertat i bida di otro pa ko’i loko. Riba dje bo tin un grupo di hende ku ta keda troumatisa pa loke a sosodé.

Ban serio ku e kosnan shonnan. Buska trabou traha i laga kos di hende para.

5. Pastor ta hòrta den misa di Suffisant. Ave Maria. Kòrsou ta kon a para bira asina. E tipo aki a tuma e kustumber di fòrsa porta di misa pa asina hòrta plaka di kolèkt. E kosnan a yega asina leu te ku a disidí di instalá kámaranan di vigilansia i esaki a duna fruta mesora.

E kámaranan a graba kon un biaha mas e la drenta hòrta i polis a wòrdu pone na altura. Mesora a sali busk’e i despues di un ratu kòrtiku a logra detené. Na momentu di su detenshon e hòmber aki tabata bon bistí kla pa kuminsá sirbishi. Desafortunadamente esaki mester a para te ku próksimo aviso.

Grandinan ta bisa ku hospital, prizòn, santana i debe serka DUO ta pa nos tur. Niun hende no ta skapa di nan. Pastor tampoko. Loke ta hasi e echo aki pekuliar ta ku hopi di nos na momentu di tende e palabranan pastor kristian mesora ta pensa riba e parti di désimo. Ta kon un hende ku tur luna tin un entrada tirando “bagòn” por hinka den su kabes pa bai hòrta? Dje sinbèrgwensa ei nos a bira awendia òf e siguidónan di misa kristian a bira ta paga solamente si nan mira resultado?

En fin laga nos keda ketu promé ku kredo kuminsá zona riba nos kabes. Amèn.

6. Kòrsou tin un total di 58 grupo kriminal/gèng. Esaki ta loke Norma(n) Serphos di O.M. a splika ayera mainta durante di e programa Mòru Bon Dia. E gruponan aki no solamente ta konsistí di hendenan ku ta kometé aktonan kontra lei. Den nan tin tambe vários hóben ku ta rèp kansionnan ku ta kontené palabranan manera:

“Rabiá rabiá den e lol*ki”

“Ton Ta Fo”

“Palu aki palu aya, Donkey Kong”

Aparte di esaki Ministerio Públiko tin atenshon tambe pa grabamentu di e asina yamá videoclip. Uzo di droga i shomentu ku arma konstantemente ta bini dilanti durante di e grabashonnan.

Ya tu sabes. Wak bosnan kaya muchanan. No kana hunga badjòn traha stem sexy den videoclip siendo bo no ta gangster. Spada di Norma(n) lo baha manera lansa di Goliat riba boso.

Asina ei nos a bolbe bati yega djabièrnè. E siman aki tabata hopi duru komokiera ku ta mei mei di luna. Tur bleki ku a sobra den kushina a keda habrí, a frifri sèn largá pa kumpra gasolin i hasta nos a mira ham di Pasku ku a sobra for di aña pasá bai fòrnu.

Nos ta bini di un kultura kaminda ser bashí ta algu masha komun. Si no tin awe lo tin mayan. Mitar kipashi serka bisiña , sèn pa bòter di gas chikitu serka amigu òf un paki di weave serka bo prima. Dal vla saka vla te dia nos bin kla.

Ala fin ala fan e kuenta a kaba pero laga mi rekordá bo ku maske…

Bo mester warda mitar aña pa un afsprak ku un spesialista, Richeron Tasz Balentin a laga sa ku Maharo Isenia lo bira lider di Partido Nashonal i den Parlamento a vota kontra di e moshon pa baha Marveline Fraudeline Wiels komo minister…

T’aki mi ta BEBA

Nos reseta di awe ta unu simpel. Aunke plaka ta skars pero mester kome.

Ala di galiña style di b.b.q.

Ingredientenan:

250 gr. ala di galiña 8 kra. di kèchup 8 kra. di Soya sous 1 tl. honing 1 tl. binager 2 tenchi konofló 1/2 siboyo salu segun smak

Preparashon:

Laba e alanan, despues seka nan bon. Machiká o mula e siboyo i e konofló finifini. Traha un sous di tur e ingredientenan 4. Hunta e hala nan ku e sous aki, lag’e nan trèk e sabor di e sous aki un ratu. 5. Pone nan den un baki pa bai fòrnu, i hink’e den fòrnu na 200 grado, laga nan bira bunita brùin.

Resúmen di siman (32)

1. E diskushon tokante matrimonio entre e mesun sekso a bolbe lanta kabes na Kòrsou. Hopi ta esnan ku ta kere di por disidí kon un otro persona mester biba su bida. Ta uza tekstonan di beibel i otro argumento pa prueba ku homoseksualidat ta robes den bista di Dios. Tur esaki ta sosode den un afan pa por logra prohibishon di un lei ku lo permití “spada ku spada” i “konènchi ku konènchi” drenta den boto matrimonial.

Si bo mira kuantu tempu ta wòrdu hinka den e asuntu aki bo ta puntra bo mes si na Kòrsou nos no tin nada útil di hasi òf problemanan mas grandi pa dil kuné. Paso ta un lastramentu di Tana i Rep’i Pampuna tin  siendo ku:

• Ainda nos no tin un ombudsman
• Preis di gasolin ta mas instabil ku Insel Air su skema di vuelo
• Na Bandabou ketu bai ta wardando riba un ambulans i truk di brantwer
• Tur dia di nobo Isla ta bati habitantenan den besindario ku huma

Djis sigui. Sigui pone enfoke riba loke no ta nos asuntu lubidando tur kos ku si ta importante pa atende kune.

2. Un ladron ku a bai purba su suerte na Building Depot a hañ’e ku sorpresa grandi. Tin hende ta lanta mainta, gloria nan kurpa i bai traha. Pero tambe tin esnan ku tur dia di nobo ta sali kas ku mal intenshon. E biaha aki si kosnan a kana otro i esei ta danki na un bewaker femenino. Na momentu ku e tipo aki a nota ku e la wòrdu gará, e la disidi di saka un kareda kore limpi bai.

Un bewaker femenino atento no a perde pa gana i a kuminsa ku un persekushon ku speed di Churandy Martina. Den ratu kòrtiku ela logra benta e tipo aki na suela i boei e. E potrètnan ta papia pa nan mes.

Awor aparte di ladron bo ta bai den historia komo e tipo ku un bewaker femenino a domina estilo di lucha libre despues kubo a balote. Nos ta desea bo suerte ku bo fama nobo den prizòn.

3. Nos ta sigui ku mas ladron ku un IQ bou di 50. Si tin un aparato eletroniko ku ta popular anto esei ta e famoso ‘aaifoon’. No ta un sorpresa si nos bisabu ku tambe e ta un di e smartphone ku ladron tin mas interes den dje. Echo ta ku pa bo horta un di e aparatonan aki i keda sin wòrdu gará ta rekeri sierto grado di inteligensia. E tipo riba e potretnan aki sea a hòrta un ‘aaifoon’ òf e la kumpra unu hòrtá.

Bo ta mira klaramentu ku e hoben ehemplar aki tin diferente hobi i ku e ta gusta pasa tempu ku su revolver sakando selfie. Si akaso unu di boso konosé e suheto aki por fabor pidié pe bai entrega e ‘aaifoon’ na polis.

4. Un aña eskolar nobo a kuminsa ayera i kasi tur skol por a risibí nan alumnonan. Facebook tabatin difikultat pa prosesá tur e kantidat grandi di potrèt ku mayornan tabata post. Muchanan bunita bisti na unifòrm nobo, sapatu di marka i tablet den rugtas.

E último aki ta kousante di tristesa serka muchanan di ménos rekurso. Nan mester para mira kon otronan si ta presentá bon bistí tur na ‘kèps’ di marka ‘hèrmèks kaminda ku nan si tin sapatu kibrá na pia. Nos kier a rekordá mayornan lo siguiente. Bo yu ta bai skol pa siña i no pa broma. Ta tipo di hendenan asin’aki ta manda Kòrsou stret den krili su wela. Nan lo krese bira grandi pensando ku ta kosnan material so ta konta riba e mundu aki.

Lástimamente tin bastante di nan ku ya kaba ta kana rònt i  bo por rekonosé nan entre otro dor:

• Di e outonan luhoso ku nan ta kore pero tòg bibando na kas di nan mayornan
• Ku tur fiesta nan ta na blanku bistí den VIP
• Ku 6 biaha pa aña nan ta bai ku ‘vongkonsi’ pero tòg ta skonde pa DUO

En todo kaso. Danki pa laga nos mira ku boso yunan a kuminsá skol awe tur na paña i sapatu nobo. Éksito i si e keda sinta kòrda pone esei tambe riba Facebook. Besos.

5. Gobièrnu ta aprobá lei ku ta prohibí artistanan djafó presentá desèmber i temporada di karnaval kompletu. Asina mes. Fiesta a kaba i ta kùp a sobra pa piki. Entrante 1 di ougùstùs artíkulo 47 ta drenta na vigor. E lei aki ta prohibí un artista ku no ta residensia na Kòrsou pa presentá sin ku e tin un pèrmit pa hasi esaki.

Konsekuensia di esaki ta ku festivalnan manera Sulegria ta kore peliger di keda anulá. Awor no a keda promotornan nada otro ku ta kontratá bandanan lokal. Den esaki nos no ta mira nada malu pero laga nos rekordá bo ku tin bastante agrupashon musikal lokal ku:

• Mester saka e integrantenan for di chòlhous i baña nan promé ku nan por toka
• Super Dynamic i Sonora Matancera ya tin integrantenan ku ta surdu òf morto
• E kansion “splits bo jangadoow’ di Paul Welvaart no ta apto pa toka riba Pasku di nasementu

Nos kier a duna un sugerensha na promotornan:

En bes di fiesta laga nos kuminsá organisá Entiero. Hasi e zaal nan manera El tributo etc. bashí i laga e artista nan toka ei’den. Pone anunsio di morto den korant i invitá tur hende bin yora henter anochi.

A yega ora pa Feco Metusalem Gomez hala un banda i laga hóbennan manera Roderick Papa Volk fiha un direkshon nobo pa AMAK. Feco no ta kore nos ke kore kubo pero BO TIN KU BAI.

E siman aki nos ta kategoris’é komo unu hopi laf. Aparte di ku Ivar Asjes, siendo Batman kaba, a postulá su mes komo Robin (kandidato pa bira lider di Direktiva pa Pueblo Soberano) i alabes ta traha trabou di obispado i ke bai invita Papa pa bin bishita Kòrsou….no tabatin masha asuntu ku a meresé atenshon di nos Resúmen. Apesar di tur esaki nos a skibié ku sumo plaser i dedikashon.

Takimitabeba.com ta resultado di un nesesidat pa alegria i kritiká konstruktivo den un tempu ku gran parti di notisianan ta karga un tono negativo. Nos ta skibi pa bo hari, yora, pensa i wòrdu eduká.

Tur komienso tin nan final pero promé ku nos laga lastra nos kier rekordá bo ku maske:

2 bòter di awa na Kura Hulanda ta kosta 23 florin, aya na Aruba un hóben a kome basta wanta despues di a joyride outo di su señora madre kousando aksidente i na Boneiru plattegrond di e prizòn den konstrukshon a keda hasi públiko…

T’aki mi ta BEBA

E reseta aki nos ta dedik’é na tur miembro di partido Pueblo Soberano. Uze komo inspirashon pa skohe un lider nobo pa direktiva di boso partido. Suerte.

Pòrchòp den sous di Pineapple

Ingredientenan:

4 pida pòrchòp 1 òns di spèki na pida 1 bleki di pineapple crushed 1 bleki di pineapple chunks 1 siboyo, 1 promentòn 2 wòrtel, 1 lamunchi 1 paki di rasenchi chikitu 3 djente di konofló 1 kuchara di kome kuné di siboyo na puiru 1 kuchara di kome kuné di ketjap zoet 1 theelepel di binager destilá Algun klabu dushi Algun blachi di orégano

Preparashon:

Primeramente nos ta laba e pòrchòp bon ku su salu i lamunchi i ora ta kla ta pone e konofló, siboyo na puiru, orégano, e klabunan i e djus di e pineapple chunks riba e pòrchòpnan. Ta brua esakinan bon den otro i ta laga e tempero aki para pa mas o ménos mei ora.

Despues ta saka e pòrchòpnan i hasa nan den masha nada di manteka i ta kòrta e spèkinan na pida pida i pone aserka. Na momento ku e pòrchòp i e spèki a kushiná bon, ta kòrta e wòrtelnan sea na largu òf rondó i ta pone nan tambe huntu ku e djus di e crushed pineapple den e wea. Ora ku e wòrtelnan bira poko moli ta agregá e siboyo, promentòn, rasenchi i e pineapple chunks i laga nan tambe kushiná huntu ku e pòrchòp un ratu.

Awor ku tur kos ta bon kushiná ta agregá e theelepel di binager destilá, i si ta deseá e sous un tiki mas diki ta agregá un tiki tomati pasta. Por sirbi e plato aki ku su aros brùin òf blanku i algun berdura.