Insel Air: piñata di pueblo

Después di orkan Matthew i Gerrit Schotte ta nos kompania nashonal di aviashon ta tópiko di kòmbersashon ùltimo dianan. Kara di hopi hende ta trèk ora bo menshona e nòmber di Insel Air. Ta manera kos ku ta un glas di binager ku èis bo a ofresé nan. Hopi retraso pa motibu di problemanan tekniko òf “crew” ku mester sosegá. Loke tambe sa wòrdu bisá ta ku tin varios avion den e asina yamá C-check. Di tur manera ningun di e motibunan aki no ta fria doló di e kantidat grandi di pasaheronan hostina.

Insel Air ta sufri di un virus ku mayoria bia ta surgi nèt den temporada di vòngkòngsi. Manera minister Nelson Navarro a yega di bisa: “Fasten your seatbelts”. Ora e virus manifesta su mes a ni hasidónan di brua kombiná ku dos indjan brabu no por paré. Bula ku Insel den e temporada ei ta bira mes kos ku kasa ku un muhé ku a yega di mata su kasá: un ora pa otro e por bolbe eksplota. No ta awor Insel ta sufri di retraso-ritritis. Mei ora òf un ora di retraso pa mayoria di nos no ta un problema pero asuntu di 6, 10 ora òf vuelonan ku ta keda kansela si ta bira dimas.

Insel Air ta un kompania ku trahadonan hopi motivá i flèksibel. Nan ta traha tur dia den un avalancha di kritika. Por ehèmpel e personal na tera. Bo sa kiko ta duru? Lanta mainta sabiendo ku atrobe bo por spera pasaheronan rabiá. Kobamentu di mama, menasa di agreshon físiko i palabranan manera “bosnan no ta sirbi” i “ mi ke mi sèn bèk awor” ta skèiru pa loko den nan orea. Tin hasta kaso kaminda a saka potrèt òf graba video pone riba internèt. Imagina bo si ta bo frei, kasá, ruman, mama, tata etc. Un kos nos tur ta di akuerdo kuné… Insel Air mester drecha su servisio pero laga nos tambe respetá su  trahadónan.

Mi mes a pasa den basta kataklisma ku Insel Air. Fo’i retraso, vuelo ku a sali mas trempan lagando mi na tera, maleta ku no a yega i avion ku a bira bèk después di tabata 30 minüt den laria. Mi a rabia, kunsumí i desea Insel Air for di dengue te malaria. Segun tempu ta pasa i Insel su retrasonan ta baha kaba subi pa na final bolbe baha mi a realisa algu. Pa mi sinta sofoka mi alma ku algu ku mi mes no por hasi mashá na dje mihó mi kai sinta trankil i por ehèmpel skibi e blog aki.

Laga nos ta sinsero ku otro. Tin hende ta reklama djis pa otronan sa ku nan ta bayendo di biahe. Ekspreshonnan manera: “oh i’m going to miss my connection to Atlanta” , “Ken ta paga e anochi pèrdí di mi hooowtèèèl na Mùrka” i “Oh my God, we are going to miss our cruise” ta zona pa bai dilanti riba Féésbuk. Tambe tin esnan ku ta bula nèt 1 bia pa aña pero ta pone drama hasi mané aeropuerto di Kòrsou ta nan di dos kas. Laga nos no lubida e èks trahadónan di DAE. Den nan tin un grupito ku no por warda Insel Air bai falliet pa nan bisa: drechi! Mi no sa kiko un of mas empleado di Insel Air lo a hasi pero aparentemente tin un odio ku hopi furia ta reina kontra di nan.

En fin. Ta parse ku awor si mi vuelo ta bai sali. Laga mi hasi un orashon promé mi subi avion. E blog aki kon ku para keda lo sali djamièrdè 12 or. Si mi no yega mi destino mi ke pa boso sa ku mi stima boso tur.

 

Felis wikènt

Si nan no ta sirbi ta paso nos a faya!

Nos dos sintá ta kombersá. Gosando di un gin & tonic a kuminsa filosofiá tokante dia di mama i konsepto mama en general. Dimes nos ta sali for di e punto di bista di un tata moderno. Despues di pasa riba e echo ku ta komersio tin dia di mama na bida, ku tur dia ta dia di mama, ku mamanan no kièr nada pa dia di mama pero si bo lubidá di malkria nan e dia ey colon ta kima! Ku mama ta keda mama i ku pa hopi mucha mama mes ta tata. Al final nos a konkluí ku mama ta mas ku e dunado di bida. E ta entre otro e protektor, edukador i partner ku ta yuda abo komo tata lanta i prepara boso yu pa e bida di adulto.

Simpelmente poné, boso su tarea ta pa lanta un mucha ku ta sirbi.

Komo tata ku yu homber chiki, nos ta yen yen di idea, speransa i soñonan pa nos muchanan. Mirando bèk riba nos mes bida nos ta mira algun lès ku nos mayornan a perkurá pa nos a siña. Kosnan ku a hasi nos exitoso den nos bida te ku awor. Mi ta sigur algun hende lo pensa ku nos lèsnan ta chapo pero si ami por a sali foi Kanga i yega kaminda mi ta awor aki, keremi ku te k@k@ mi yunan lo haña e mesun lèsnan.

Ata e prome 9 lèsnan aki:

No. 9 – Bo mester di un bon edukashon o un fishi ku bo por gana bo pan di kada dia kune. Komo homber bo mester por pone pan den kas i bolo riba mesa!. Bo no tin nodi di ta Drs. ni Dr. Pero den e mundu kompetitivo ku nos ta biba bo mester por algu pa bende bo mes.

No. 8—Bo mester tin un trabou. Tin un trabou ta un muestra di stabilidat, di ser responsabel i di mustra ku bo ta traha pa kosnan ku bo kièr. Mi yu tey traha sea pa su mes o pa otro pero e tin di traha si.

No. 7— Bo mester siña mara dashi. Tin okashon den bida ku bo mester bisti flus ku dashi. Ni maske kon moderno bo ta sintibu. Dress to impress. Kèds ku jeans no ta pa tur kaminda.

No. 6—Bo mester kuida bo aparensia. Pela i peña bo kabei. Bo aparansia ta un refleshon di bo mes. Barba manera di Oompie Stroopie a bai foi moda foi tempu Ben Whiteman tabata pas den size M.

No. 5—Bo mester por papia i dominá un lenga korekto. Sea bo ta skohe Papiamentu, Ingles, Hulandes o Chines pero perrfekshoná un di nan. Komunikando korekto ta habri porta pa bo.  “Se swa”, “Ki ba hasi” I “tur tur riba chest” ta lagabo aparesé komo un bobo.

No. 4— Bo tin ku spar. Un homber mester tin sen poné un banda pa dia dam seká.

No. 3—Bo mester respetá otro. Solamente ora bo duna rèspèt bo por eksigui rèspèt. Speshalmente di e ser muhe. Pa un muhe respetabo, respete prome

No. 2—Bo mester di un plan. Bo mester por pinta kon bo ta bai logra bo soñonan den bida.

No. 1—Bo mester di un soño. Tin un soño ta dunabo e rason pa stima, algu pa biba pe, traha pe I perseverá. Soru pa algu inspirabo den bida.

Mi sa ku e lista no ta kompletu, tin muchu mas kos pa nos siña nan.  Pero nos a yega na final di nos botèr di gin.  🙂

Ta nos ta lantando e futuro di mañan, si nan no ta sirbi ta paso nos a faya!

Resúmen di siman (44)

Dr. Rolfast ta hasi bofon di pashènt

E trabou di un dòkter ta mas un yamada ku un profeshon. Bo ta traha ora nan largu i hopi bia bo tin mas tantu pashènt ku bo por atendé kuné riba un dia. Ta lógiko ku debes en kuando kansansio por sòru pa iritashon. Konsekuentemente esaki por pone bo atendé esnan ku mester di bo yudansa ku ménos pasenshi. Nos tur ta ser humano ku ta kometé eror.

Loke si ta difísil pa aseptá ta un dòkter ku intenshonalmente o sea pa malu ta keda insultá i provoká su pashèntnan. Sera konosí ku Dr. Rolfast. E tipo aki a ninga di yuda un mucha di 2 aña ku tabata keha hopi di doló di orea. Riba esei e la tribi di chèrcha mayornan di e kriatura aki.  Segun e mama:

Manera e mama mes a bisa. E kos aki ta inkreibel. Ta kon un hende ku a huramentá pa yuda su pashèntnan por hecha un baina di e forma aki? Dr Rolfast laga nos djis rekordá bo un parti di lokual bo a huramentá pe:

“Ik zal ervoor waken dat mijn houding tegenover patiënten niet beïnvloed wordt door levensbeschouwing, politieke overtuiging, sociale stand, ras, etnie, nationaliteit, taal, gender, seksuele voorkeur, leeftijd, ziekte of handicap.

Ik zal het leven en de menselijke waardigheid eerbiedigen.

Zelfs onder druk, zal ik mijn medische kennis niet aanwenden voor praktijken die indruisen tegen de menselijkheid.”

Hippocrates

Tin un dicho ta bisa: “ na Kòrsou i den shelu tur kos por” i ta di e manera ei mes bo ta sinti bo ora algu asina sosodé. Sea Dr. Rolfast ta kambia su manera di atende ku pashènt òf e bai kai sinta riba su mes stethoscope i skucha su bos “interno”

Pueblo ta kuestioná Jandino Asporaat su pelíkula nobo : Bon Bini Holland

Nos a kustumbrá di mira nos mes hendenan bria den programanan di televishon hulandes manera Opgelicht, Opsporingsverzocht i Wie is mijn Vader. Awor ku Jandino Asporaat ke duna un toke kómiko na e bèrgwensa ku  “no me ku no me” ta kousa kier hunga santu i konden’é.

Vários ta esnan ku a mustra nan mal kontentu pa ku su pelíkula indikando ku esaki ta soru pa stigmatisashon di nos hendenan na Hulanda. Un remarke ku a hala nos atenshon ta bisa lo siguiente:

“Inbox bro…. Mi ta poko desgusta

Charmante Oplichter van Curaçao. Mag ik heel even mijn ongenoegen uiten. Jandino Asporaat is een top entertainer…. Applaus, maar waarom kies Jandino Altijd om een Curacaoenaar cq Antillianen neer te zetten voor domme, asociale of Oplichter. Dit vinden we blijkbaar leuk en grappig.

Alle Curaçaose types dat Jandino doet zijn dom, agressief, asociaal en nu ook Oplichter. Kom op man.”

Awor sea Dios a trompeká ku un hèmber di estupides i lag’e plama sin e por a yuda riba sierto hende su kabes òf gewon nos gusta skonde pa e bèrdat.  Loke Jandino a hasi ta simplemente komersialisá e eskases di inteligensia bou di un grupito di nos hendenan. E eskases aki ta pone ku nan mester rekurí na e instinto animal pa komuniká ku otro ser humano lokual hopi biaha ta resultá den agresividat.

Jandino Asporaat ta gana su plaka presentando nos mal komportashon di un manera kómiko na e públiko Hulandes… i abo?

 Despues di dread awor ta kadena (Club Spoonz)

“Spongs”, “Spons”,  “Spoens” “Kuchara”. Tur ta nòmbernan di kariño ku a duna e klup aki ku awor atrobe ta den notisia. E biaha aki no ta kabei di dread ta e tópiko pero bistimentu di kadena riba paña. Un pareha ku a pa bai dibertí nan mes den e klup a konta ku:

“Bon loke ku ta Pasa ta ku ayera nochi ami ku mi parega a sali pa bisita u night club kwal ta e sun asina popular spoonz. Nos ta jega na entrada di e club ami ta drenta mi parega ta drenta huntu ku mii nan ta kontrola ami i mi parega.

Diripeinte un security ta bisa mi parega pa hinka su kaden paden di su t-shirt mi parega desentemente ta sigi e ordu di e sucurity i hinka e saki paden… pero kereindo ku porta ta djis pa kaba hasi e kontrole oke nos ta sigi bai paden i stashona na nos sitio pa disfruta di nos anochii.. despeus di kasiii un ora den e club nos ta para security ta hasii un señal ku mi parega pa hinka e kaden den e t-shirt atrobe ma bisa mi parega pa kiko ta kiko e kos di pantomina aki ku hinka kaden aden…

despeus mnr security ta bolbe bin no serka mi parega awo pero serko ortro hende den nos banda splikando nn ku tin ku hinka e kadeb den e t- shirt of sea den e kamisa..

Splikando tur hende ku nuin hende homber no tin mag di tin kadena saka pafo pone riba nn t- shirt of kamisa e mester ta tapa pande ..paso ta regla nn di doño ku no tin mag wtffff???

Awo mi pregunta ta ?ta dkn no tin mag di tin kadena saka pafo den e club kiko ta pasando ke luga aki mi ta konpronde ta regla pero e reden pa ku e sakii mino por konpronde..

anto kiko ta mas pret e securety ta bisa bo hinke aden ku masha splikashon en zo bira bai nn ta bolbe sake ate ta bolbe bin pa bisa bo hinke aden ainooo anto ku un luga ku 300 hende pa 400 hende hinter anochii bo ta kana hasi e pantomina ei

Club spoonsz nos ta haña bo !
No dread
No smooking
No sneakers on friday
An now …… no mag tin kaden pafo pe homber nn
Anto next no mag di bin pechu afo pe hende muhe…

Peeps ami no sa kiko bosan ta pensa pero mi ta vind e kos aki un poko dimasss awo.”

Tur klup tin nan reglanan di kas. E problema di klup Spoonz ta ku sea no ta informá bishitantenan na un forma efektivo òf simplemente tur siman ta inventá regla nobo. Un kos nos tin di remarká. E fenómeno di bisti kadena bou di hende hòmbernan a bai for di moda for di aña 1998. Konsiderando esaki nos ta uni nos mes ku e biaha aki ku e klup su desishon pa tur hende tene nan kadena bou di nan paña.

Nos kier a hasi un súplika na tur hende hòmber ku ta bisti kadena estilo “koningsketting” i otro atrosidat pa por fabor bende esaki nan i kumpra un bon oloshi, òf un Toyota Vitz.

The Guardian Group ku otro eksitoso Guardian-Loop (Fatum-Loop)

Despues di a organisá e kaminata aki pa mas di 30 biaha sigui e aña aki tambe e la resultá den un éksito rotundo. Manera semper e anochi promé ainda hopi hende tabata subi facebook i puntra ken por tin tishùrt bende nan. Nos a komprondé ku tishùrtnan a wòrdu bende pa asta dòbel di e preis i den un kaso asta a troka dos tayer di un suzuki swift pa un tishùrt sais m.

Riba e ruta mes kosnan a kana bon i nos por a nota vários partisipante ku a kòrta i dòrna nan tishùrt manera kos ku ta baimentu di Jump-in tin. Tin tambe ku a kose 2 tishùrt na otro pa krea un shimis i bisti sapatu hilchi haltu. Kada loko ku nan teima.

Loke si nos no por keda sin kuestioná ta lo siguiente. E mes un esfuerso ku a hasi pa lanta 5 or di mainta riba un djadumingu a kaba na “aros con coco” pa su siguiente dia. Hopi mucha a yega skol lat i dòkternan di kas tabatin man yen ku tur e pedidonan pa karta di AO.

Nos a perde kaminda pa loke realmente ta importante. Tur kos ta drai riba hasimentu di kos pa bista di hende. Klaramente hiba yu skol na tempu i bai traha maske bo ta un tiki kansa no ta kai bou di esei.

 Hagel na Aruba. Bèrdat òf mentira?

Djadumingu último a sosodé algu úniko na nos hermana isla Aruba. Durante di un mal tempu ku a soru pa hopi áwaseru na un momento dado hagel a kuminsá bini abou for di shelu.  Facebook i otro medionan sosial tabata kolma ku potrèt i testimonio di vários persona ku a mira esaki. Servisio di meteorologia no a konfirmá e kaida di hagel pa motibu ku e personal no a mira i tene esaki den nan man. Esei ta pone ku ofisialmente no por bisa ku tabatin kaida di hagel.

E deklarashon aki a kai den masha mal tera bou di esnan ku si a mir’e. Boneiru tambe a tuma nota di loke a sosodé na Aruba. Pa demostrá nan kombibensia a graba e siguiente video:

Apesar di tur kos tòg nos a logra yega djabièrnè. Mayoria hende a kobra i awe lo tin hasimentu di drùk na happy hour.  Si ántes tabata bai happy hour pa dibertí i relahá awendia ta uza e momentu aki pa:

• ‘Netwerk’ buskando pa subi di posishon riba lomba di otro,
• Broma i konta kon karu bo Audi ta i ku bo a kaba di kumpra un kas na Vista Royal

E manera di bisti tambe a kambia. Si ántes bo tabata los dashi, saka kamisa afó i laga bachi den outo awor ta sali trabou bai kas bisti flus bin bèk.

Un set makakeria pa na final drenta outo di 90 mil florin i bai drumi den kas di mayornan òf flèt den kura.

En todo kaso. Nos ta spera ku un biaha mas nos a sabi di deleitá bo ku e susesonan ku na nos pareser tabata bale la pena menshoná i kòrda semper ku maske:

Broertje a kou Milly Ras dje brutu ei ku hagel a kai na Aruba, Mòru Bon Dia tin un decor nobo pero Glenn Thomas si su flus a keda mes chapo i Obispu Luis Secco a kumpli 45 aña komo saserdote pero pastor Simon Wilson ketu bai ta missing in action…

T’aki mi ta BEBA

 

Resúmen di siman (41)

Nicole “Bonnie” Lake ta bèk na G.O.G.

Esaki despues ku un biaha mas e la logra skapa for di e instituto. Nicolle su historia ta unu hopi tristu ku a kuminsá for 21 di febrüari 2013. E dia ei e la kue pleitu ku su mama i bai for di kas. No a dura muchu ku a gar’e. Dia 28 di ougùstùs 2014 a trasladá Nicole pa Huize Rose Pelletier. Na su yegada e la saka un kareda kore limpi bai laga e personal.

Durante e temporada ku e la keda komo fugitivo di lei Nicole a hasi vários deklarashon via di facebook bisando entre otro ku:

“Nicole Lake

15 hrs ·

Fuck cops bosnan bai traha basti manda mensaje ku koi mariku pami”

“Remove

Nicole Lake Nan mag bin wak mi pero si nan logra keda bibu te pa nan bai kumi te kos

14 hrs · Like”

Den 2015 Nicole a bolbe hui un par di biaha i durante di e penúltimo biaha e la forma parti di un grupo ku tabata tira atrako.

Si bo ke bo tuma nos na malu pero Nicole Lake ta un spil di nos komunidat. Na promé lugá mester wak ta kiko tin tras di tur e aktonan aki. Ta imposibel ku un hobensita di 14 aña ta lanta bisa ku desde awe e ta bai hiba un bida parotin kometiendo aktonan deskabeyá i kriminal. United Nations a proklamá 20 di novèmber komo dia internashonal pa derechi di mucha. E derechinan mas importante ta:

• Derechi riba edukashon
• Derechi riba kultura i religion propio
• Derechi riba un nòmber i nashonalidat
• Derechi riba un opinion propio
• Derechi riba protekshon i un bida salú
• Derechi riba protekshon kontra di maltrato i violensia
• Derechi riba protekshon den kaso di un guera
• Derechi riba kuido médiko
• Derechi di krese serka su famia

Aparte di tur esaki Unesco ta lubidá ku tur mucha tambe tin deber…

Komo mucha bo tin entre otro e deber di:

• Habri orea skucha ora bo mayornan ta papia ku bo
• Sera bo boka den klas ya asina bo por komprondé loke e dosente ta splikando
• Evitá tur komportashon ku por hiba bo den krili bo wela na grandi
• Alehá bo mes di mal amigu/amiga
• Aseptá lokual bo mayornan por kumpra pa bo i no keda yora mara hende pa “Aifoon”

En fin. Nicole ta bèk kaminda e mester ta. Ban spera ku e lo kambia su komportashon promé ku ta lat.

John de Haseth miembro di PPA malamente gará “haciendo cosnan vies banda di beachnan publico”

Segun e periodista Nelson Speed Andrade e konosido politiko di PPA John de Haseth a hasi su mes kulpabel di aktonan inmoral na un luga publico. Nelson a konta ku:

“Esaki ta John de Haseth haciendo cosnan vies banda di beachnan publico. Tur dia e ta yama radio insulta tur hende den forma baho pa tur cos. Un gran sinberguensa cu debe cantidad hende. Un hende cu boca hopi sushi. Wak con a gare ta haci cosnan vies riba beach. Masturba y purba tira man riba cos di guynan jong na beach. Dialuna sigur ainda lo bo tende grita ofende hende. Ata pa tur hende mira kende ta e miembro di Grupo di 7 cu ta haci cosnan vies riba beachnan di Aruba den oranan di anochi. No ta cos cu mi kier publica pero mirando con baho e ta lastra hende tur dia via radionan sin ningun prueba, ata un prueba pa tur hende mira. Spera cu esaki e siña su les. Haci bo cosnan personal y vies na bo cas.”

No komprondé nos malu. Ku ta hòmber John gusta esei ta su asuntu. E problema ta sintá na e manera ku e ta purba di sasia su set. A ni den e mundu di animal e kosnan no ta kana di tal sistema.

Riba e siguiente video por mira klaramente kon John ta baha su karson i kometé semehante atrosidat. Nos ta konsehá un i tur ku tin un stoma delikado pa no mir’e.

Afpakteam formá pa O.M. i KPC a kuminsá ku nan trabou

Ta basta luna pasá O.M. a taha boso tur. Nan a anunsiá ku lo bai kita tur plaka, propiedat i otro artíkulo ku a wòrdu kumpra ku plaka prosedente di benta di droga òf otro aktonan kontra di lei.  Ya kaba nan a kita vários outo luho, kasnan grandi, un kantidat di tete i atras falsu i asta dos djente di oro for di vários persona.

Tambe a bai na vários adrès i konfiská un gran kantidat di weave humano brazilian, indian di tantu e vershon standart komo esun ku ta wòrdu uza pa laser. Na sierto adrès a hasta logra konfiská tasnan di marka i un kaha di te marka Badia.

Tur esaki tin komo konsekuensia ku fin di aña aki probablemente diferente fiesta i otro aktividat lo ta ménos bishita kompará ku añanan anterior. Laga nos ta sinsero ku otro. Nos ekonomia kon ku bo mir’e ta drai pa un parti riba plaka ku ta bini di aktonan kriminal. Dealer di vehíkulonan di plaser, promotor di fiesta, joyería, diskotèk, lugá di hür outo etc. tur lo  bai sinti e efekto negativo di e akshon aki. Tur outo, bròmer, jet ski, karchi di fiesta VIP, bòter nan di bibida etc lo keda para kue stòf. No ta ke no ke gasta plaka pero ta tin no tin plaka pa gasta mas.

Un grupo ku tambe lo haña un sla formal ta e asina yama goldigger-crews. E “crews” nan aki ku ta wòrdu forma tantu dor di hende muhé komo hende hòmber. Nan komportashon por wòrdu kompará komo esun di un karpata. Tur loke ta move i tin sanger (i den e kuadro aki plaka) lo ser ataká.

Na fin di novèmber lo bai tin e promé fiesta kaminda lo por midi ki efekto e Afpakteam di bèrdat tin riba farándula i nightlife di Kòrsou. Ta trata aki di All in White goes Red. Nos lo mira ken ainda por “make it rain” i ken ta “out of the game” pa motibu ku O.M. a laga nan mal di “drain”.

Alex “Bambi” Rosaria ke nombra biná di Korsou animal ofishal

Esun ku hinka den su kabes ku Kòrsou su polítikonan ta hopi okupá ku adelanto di nos pais ta kompletamente robes. Señor Rosaria ta hopi lew for loke realmente nos pueblo tin mester. Riba website di su partido nos a bin topa lo siguiente:

“Lider di Frakshon pa Partido PAIS a manda un karta pa minister Dick pa pidi esaki informashon tokante di nos animalnan protehá ya ku e leinan aki ta data di mas ku 80 aña pasá. Tambe Rosaria ta pidi pa hasi e biná di Kòrsou (Odocoileus virginianus curassavicus) komo e animal ofishal di nos pais.”

Si Alex Rosaria kier e mag hasi a biná di Kòrsou maskota di su partido. Nan tin basta tempu ta kore duru pa nan responsabilidat tòg. E biná lo karga e nòmber:

“Partidus Swakus Corehopidurus Patraboucus Papueblus”

Me doy.

“Agiws”

Esei ta e denominashon ku desde awor nos lo bai uza pa presentá boso tur sorto di disparate ku ta wòrdu papia riba internèt i por en general facebook. Mas abou ta sigui lokual ku mas a resalta e siman aki. Den un palabra AGIWS..

Insel Air vs Avior (Bòmbòshi den laria)

Ademas di soru pa vuelonan sali segun skema e personal di Insel Air tin hopi mas talento. Nan ta dominá vários idioma i esei bo por skucha klaramente den e siguiente grabashon. Ta trata aki di un diskushon entre pilotonan di tantu Insel Air komo Avior. E motibu no ta konosí pero bo ta skucha si kon kada unu ta defendé nan kurpa firmemente.

Awe ya ta 9 di òktober 2015. Kiko bo a logra den e siman ku ta kabando ? Bo tambe a pèrdè jet ski, bròmer i weave ? En todo kaso. Awe tambe tin Regatta na Boneiru i esei mes ta e motibu pa kua for di awor nos ta despedí di bo pero kòrda semper ku maske:

Den konseho di minister a vota unánimemente pa no selebrá e promé lustro di pais Kòrsou,  Aubrey Janga su reportahenan a kuminsá parse esnan di e programa “Ocurio Asi” i segun señor Werner  Wiels mester kuminsá traha flèt purá paso kos tei drecha…

T’aki mi ta BEBA

Resúmen di siman 40

Yùfrou Mazarella por ta mustra masha lif, pero e ta loko tambe!

Komo dosente di un skol sekundario bo mester tin hopi pasenshi. Alumnonan ta purba tur sorto di kos pa pone bo rabia i sali for di bo kueru. Na momentu ku yùfrou Mazarella a duna dos alumno baldadi “strafmiddag” e no por a imaginá su mes e konsekuensianan di esaki. E la bin topa winshil di su outo mancha na skupi. Mesora e la kohe un muestra di e skupi ku un katuna i a lansa un atvertensia riba facebook bisando:

Ta e nivel aki nos a yega awendia. Ta tuma medida disiplinario kontra di bo pa bo siña di bo fout i bo ta paga esun ku ta purba yuda bo dor di kometé bagamunderia kontra di su mes persona. Awèl wak bosnan kaya paso yùfrou Mazarella ta kambia Mazakoñirella un bes! Ta un bèrgwensa ku mayornan ta kria nan yunan di e sistema aki. E generashon di “Tèblèt”, “Mi mama su Èssjjjuviiie” ta mas karu ku esun di bo mama” i “Do the stanky leg” aki mester a wòrdu traha ku sea awa koko, binager òf skupi.

Laga nos mira si esun òf esnan ku a kometé e akto aki tin e kurashi di sali pidi despensa.

Kasino promé i si sobra tempu bo yu despues

Kumpramentu di number, bièchi, lòt i hungamentu di plaka den kasino ta na órden di dia den e komunidat chikitu aki. Hende nan ta frifri delaster un depchi pa purba nan suerte. E ambiente den kasino ta unu hopi pekuliar. Huma di sigaria ta prek bo wowo, hòmber i muhénan drumi dilanti mashin di plaka wardando ken ku ta bin trese sèn pa por sigui hunga i otro bishitantenan ku ta gana gatia kos di bebe pòrnada. Adikshon ta bira un problema muchu mas serio na momentu ku mucha chikitu wòrdu konfrontá kuné. Den siman ku a pasa nos a tuma nota di un potrèt kaminda bo por mira un hobensitu di mas o ménos 6 aña para pafó di un kasino na Áwasa. Segun esun ku a pone e potrèt e la a wòrdu saka despues di 12 or di mardugá.

E fenómeno aki no ta nada nobo. Ta tur dia tin muchanan menor di edat sinta sea den outo òf parke Wilhelmina, drumi den kas di hende straño òf simplemente para pafó dilanti di e kasino ta kue serena. Nos a bira kampion den pèrdèmentu di kunes. Kon ku para keda, basta nos por drenta Kasino i Campo Alegre tira kòpròl pa sasia nos set lagando e mucha sintá den outo òf para pafó di e lokalidat.

Di un otro banda e tipo di mayornan aki si sa di rabia na momentu ku nan yu no slag pa “havoow”. E ora ei si ta rabia skol tin riba nan yu òf e yùfrou/mener no gust’é. Ta kon e pober ta hasi logra lo máksimo na skol si vários biaha den siman e ta pará 12 or di mardugá dilanti Kasino wardando riba bo ?

Baby momma drama

Nos tur su bida por kambia den un frakshon di sekònde pa diferente motibu. Unu hopi konosí ta ora “pai bai laga mai”. Ta momentu nan mashá difísil i doloroso ku ta pone bo hopi hende desesperá i hinka “ki ku ta” den kas djis pa nan no ta nan so. Tambe tin esnan ku kue kaminda di “misa”. E grupo ku mas ta hala atenshon ta esun ku ta skohe pa e asina yama “baby momma drama”.

Baby momma drama ta e medidanan (hopi biaha violento) ku e èks kasa, muhé, frei òf bachilala ta tuma na momentu ku su hòmber bai lag’e pa un otro. E ta kuminsá normalmente ku un kantidat eksesivo di yamadanan telefóniko. Despues poko poko e situashon ta eskalá i okashoná raspamentu di outo, hasimentu di bochincha na kas di (èks) suegro, bringamentu dilanti di porta di skol, kobamentu di mama te den kantor na trabou i lastramentu di otro via medionan sosial.

E biaha aki a toka turno na Vivienne i Talitha pa fungi komo protagonistanan prinsipal di te medianovela “Dal mi awe, Kore duru mañan”.

E medianovela aki ya a kousa estrago den Rotterdam i un fanátiko fiel a komentá lo siguiente:

“Dama nn shushi ku ta laga yu hasi koi bura. 2 rival ku ta ch*nga ku e mesun pat*n ta hasi koi brua despues di 2 dia ku nn a konose otro. Vivienne legrand muhe shushi lastra  bono tin berguensa bo tin homber na kas. Talita ga lekker ganbangen met alle mannen van spangen zoals gewoonlijk banga, pijpslet zielegerd. Hinka pober mucha chiki den nn chochoria DE MAN WIL JULLIE ALLE BIJ NIET. Vivienne laba abou pe no keda hole fresku…..”

Laga nos no tene boso mas den suspenso. Klik riba e video i saka boso mes konklushon.

Suzanne Camelia Römer ta duna wòrdu pa basha kas abou

Bou di su mandato a laga basha un kantidat di kas abou ku no tabata rekerí di e pèrmitnan nesesario no opstante ku, segun DROV a duna doñonan di kas tempu pa regla esaki. Si wak e asuntu aki a base di lei mesora bo ta saka e konklushon ku a aktua di e forma korekto. Di un otro banda tambe mester tene e aspekto humano na kuenta.

Ta loko nos a bira den e pais aki? Kon nos por tribi di basha kasnan abou sabiendo ku tin lista largu na FKP di hende ku tin 15 i 25 aña wardando riba un kas pagabel ? Dikon no por a duna e hendenan aki un tipo di dispensashon señora Camelia Römer ? Bo a laga basha kas di hendenan ku ya tabata poko marginá abou i pone nan den un posishon muchu mas pió.

Un di e kasnan aki tabata pertenesé na un damita di 27 aña ku tin 2 yu muhé. E la traha duru i ku sodó di su frenta i sin mester fia plaka òf pidi niun hende nada e la logra traha su kas. No opstante ku e tabata falta solamente 1 papel pa e por a regla e pèrmit na DROV su kas tambe a wòrdu bashá abou. Ta pe tipo di kosnan aki nos a pone boso riba e puesto ei ? Suzy Camelia Romer bo kier bisa nos ku Partido Nashonal di Pueblo a duna bo libertat pa desgrasia e pueblo ? Humphrey Davelaar òf un di su kompinchi nan no por a papia ku bo ? Papia su bon papia su malu…Hamas de los hamases Pueblo Soberano lo a laga un minister kometé tal fechoria. E lo tabata “out” su siguiente dia.

Ta kon tili si anto tala no ?

Tin un kantidat enorme di konstrukshon ku a wòrdu trahá di un forma ilegal i ku ta wòrdu uza komo negoshi. Te awe nan no tin e pèrmitnan nesesario. Ki dia ta basha esei nan abou ?

Nos ta un pueblo sokete. Nos ta gusta tuma soketada, skòp i bòfta basta nos haña kos pòrnada. Ki dia nos ta siña ?

Aparte di sokete nos pueblo gusta yuda tambe. Awor ku e damita aki su historia a sali den publisidat hopi ta esnan ku a saka un man i yuda mesora i esaki sigur nos ta aploudí.

Awe ya ta 2 di òktober i ta falta solamente 2 luna i 29 dia promé ku aña 2015 bisa nos “bai laba le sènk”. Ta úniko kos e por bisa nos si bo mira kon e aña aki a bai te ku awor. En fin. Ta fin di luna i tin plaka pa gasta. Un rekordatorio ta bai na tur tata responsabel pa kòrda hiba e prikichi pa e yunan tin moda di kome, bebe i bisti. Mamanan tambe wak boso kaya i kòrda uza e sèn di un forma honesto i no bai kumpra karchi di fiesta, kabei falsu, Hyunday I10 i Kia Rio lagando boso yunan sin kuminda.

En todo kaso. Laga mi rekordá bo ku maske drechamentu di kaya ta kousando hopi problema pa komersiantenan, e All in White Party ku nos a kustumbrá kuné su siguiente edishon lo “go red” i durante un wega di futbòl lokal un linesman ta nòkout un hungadó di forma fulminante…

T’aki mi ta BEBA

Nos sa ku bo a kustumbrá ku reseta pero awe nos tin algu otro pa kompartí kubo. Ta trata aki di e kansion titulá NO TA KUMPLI.

Segun e outornan:

Di e forma aki nos ta yama e luna October welcome ku e kantika “No Ta Kumpli” Ft KaBalaChi i Mosta Man produsi pa Apolo. E kantika aki no ta di nos pero di pueblo i pueblo lo ta mas ku ready pa otro anja October.
Share Like Comment hasi loke bo tinku hasi pa full pueblo no tende pero SKUCHA e song #‎BanPamiii

Analisá e letranan i disfrutá di dje.

Resúmen di siman (38)

Olivier Arrindell vs Gobièrnu, Radio Dirèkt, i korant Èkstra

Ta generalmente konosí ku e proseso rondó di hañamentu di pèrmit por kosta bo un igra, nir òf matris. Hopi ta esnan ku dia den dia afó mester keda yora, sklama puntra i hasta tin bes chupa pa nan por bin kla. Otro nan ta kue fadá i kuminsá operá sin e pèrmitnan nesesario. Ava Airways ta un bon ehèmpel di kon kosnan por bai kompletamente robes.

Nan tin kasi 2 aña wardando riba un kontesta di parti di gobièrnu. Segun representantenan di Ava Airways, Olivier Arrindell i Giovanni Atalita e úniko kos ku nan ke tende di gobièrnu ta “Si” òf un “No”. Na lugá di hasi esei ta preferá di keda ketu i ignorá nan persona. Ora kos a kuminsá bira kayente gobièrnu a kontesta ku pa trata e petishon di pèrmit mester sòru promé pa un garantia na balor di 48 mion dòler. I ta aki Colon, Sambil Zuikermall a kima.

  

E situashon a bira mas pió ora ku mikrofonistanan di Radio Dirèkt a kai den e asuntu aki. Laga nos ser sinsero ku otro. Un pais ku su gobièrnu ta tuma kasi dos aña pa djis bisa “Si” òf “No” ta un pais kanando wowo sera den direkshon di un abismo. Kuantu esfuerso ta kosta pa duna un kontesta? Lo por a evitá tur e bululú ku awe ta tópiko di dia. Mundu kompletu ta wak nos i hari.

Danki Dios e problemanan rondó di e asuntu aki tambe ta sòru pa hopi harimentu. Entre otro Olivier a regala Richeron ‘Dem a Bleach’ Balentien un bòter di kloròks i tambe e la batisá dos buriku dunando nan nòmber nobo (Liesjeron i Djèzzzmin). Tambe e la mustra prueba di un kombersashon masha ameno ku e tabata tin ku Anthony Pieter di korant èkstra. En fin nos ta harma e sirko i boso ta kordialmente invitá pa disfrutá di e show.

Un Kòrsou Hustu un otro desgustu ?

Despues di 25 aña den polítika Omayra Leeflang a lansa su mes partido. Segun tradishon tur partido polítiko ta wòrdu rekonosé na nan koló. Un Kòrsou Hustu lo karga e koló lila. Un grupo basta grandi tabata presente riba e dia di inougurashon. Diferente persona a hiba palabra dunando e partido su motibu di eksistensia. Na final por a dal dos beter i kombersá.

Otro aña tin elekshon i no ta nada straño ku den pitu tin partidonan nobo ta nase. Konsiderando kon kos a kana e último 5 añanan aki tin hende ku ta asta papia di un alivio. Ban mira kiko Un Kòrsou Hustu tin aden. Kòrsou meresé lidernan kapas pa hiba nos dilanti. Hende nan hóben, bon studia, ku gana di traha i sin interes propio.Bo mes por komprondé e ora ei ku e tipo di hende nan ei hamas de los hamases lo mete ku polítika konsiderando e situashon aktual.

Ta un manera so tin pa pone un paro na e kataklismo ku nos ta den. No vota mas pa ningun partido ku a hecha baina. Si asina mes. Niun i ningun. Tambe nos mester stòp di laga kos pòrnada susha nos mente.

Shantyskeer unda mi 320 euro a keda alweer ?

E mundu di kabei falsu ta unu kaminda hopi plaka ta lora. Pa un pida “band” di kabei bo por paga mas di 200 florin. Imaginá bo si bo kabes ta hopi grandi ta kon lo bo hasi. Ms. Belly Maduro ta un damita hopi konosí pa tur esnan ku ta gusta kabei falsu. E ta duna entre otro servisio di saka sla, kambia zeta, “frangbel” i “shokeshorber” ora ta trata di kabei falsu. Hopi hende muhé ta drenta kabes tur komé i sali manera promé finalista di Miss Universe.

Ms. Belly Maduro bon konfiá a laga Shantyskeer bin hasi kabei na su kas keriendo ku e lo haña su plaka mesora. Kos a kana otro te ku Ms Belly a fada i pone su relato riba facebook pa tur hende lesa.

Segun Ms. Belly Maduro

 “Nunka mino a pensa ku lo mi mester buta un kliente su kara riba facebook paso ela bin hasi kabei sali mi kas SIN PAGAMI y tur bia e bisa ku eta bin trese mi sen PERO SEMPER tin algu ta komt daarvoor ku eno por bini pagami.. Ora ami bise ku mi mes tin auto mi ta bin tume te unda e ta e ta bira traha kalke smoes.. Ami ta traha hopi duru pami sen y niun persona sinberguensa ta kere ku ta burla dimi..

Lang verhaal: e juffrouw ribe potret aki jama Shanty,,ku kual porsierto e potret nan aki ta ku mi lacewig buta anto ela BIN HASI KABEI SIN PAGA!!!
Shanty a bini hasi kabei serka mi dia 12Aug ’15 prome ku ela jega pa su afspraak ela lagami sa ku un familiar di dje a manda e pago riba mi rekening kaba..
Ami bon konfia ma lage drenta mi luga pe sinta hasi kabei.. Kaba mi ta bise lagami wak e bewijs van betaling mi ta mira ku falta net 1 sifra di mi rekening nummer.. Eynan kaba mi ta sa ku algu no ta klop,,paso bo no por kompleta un transakshon anto falta un number di kuenta.. E banko mes ta bisabu pabo verifika e number paso eno ta bon.. Enfin, Shanty aki a bisami e pago a bai riba otro rekening, keriendo ku ta Lolin Farandulin ta para su dilanti,, anto ku eerst volgende dag ku e pago no ta riba mi rekening e mes lo bin trese pami..
Siguente dia mi a hanja pago di tur sobra kliente ku a bestel algu serka mi pero net di Shanty no. Ma kontakt e, e di kumi ku warda e bel e familiar di dje ku a manda e pago pa asina e bise ku e pago no a pasa y pa bolbe pase riba su mes kuenta asina e mes por pagami. Ma laga algun dia pasa bai y ainda nada. Shanty ku hopi kurashi a asta puntrami pa un otro afspraak pa penja anto asina eta pagami cash tur kos mesora, ma dune un afspraak paso ami ta mi sen mi mester, KOS KU MA VERWACHT ta ku e siguente afspraak ku ma dune pa dia 20Aug eno a kom e na tampoko..
Ami mester a app e, ora ku ma mira eno a jega pa su afspraak, pa puntre kon lew eta y Shanty aki ta bin bisami e ta bai kai laat trobe eno ta bai haal pa bin penja.

Ja aki ma sospecha ku e juffrouw ki ta blo bashi,, kaminda ela papia jen kos ku e tin jen sen eta bai largu ku vakantie dit dat, ela opera body saka jen sen blablabal.. Pero tog bo debemi 320€!!!!
E peluka ta kosta 285€,, anto door ku eno tin kabei (kabes limpi) ma kobre 35€ pa bute..

Enfin awe ta hasi 1 luna kaba ku eno a pagami ainda y kada bes mi puntre etin un smoesje,, ku eno ta na rotterdam eta lew anto lastu a bin hasi zielig bisami ku ela hanja problema ku e familiar pesey eno a logra pagami ainda ( esey no ta mi problema) BO NO MESTER A HUNGA GRANDI BIN HASI KABEI SI BO TA BLO BASHI..
Ma bisa Shanty hopi bes ku mi mes ta bin tuma e pago pero kada bes e tin un smoesje.. Siman pasa ultimo ey ma app e bise ku mi ta dune te ku djamars pa pagami.. Ela ignora hasi stoer wel ami no ta esun ku ta pasa berguensa sino e mes.. E mes a hinka su kurpa den e situashon aki..
DIA BO PAGAMI MI 320€ MI LO KITA E POST AKI FOI FACEBOOK!!!!

Anto mi tin prueba (screenshot) di tur e app nan kon Shanty aki ta keda birami pa paga y hasi stoer tambe,,hopi lef y berguensa bo mester tin.. Manda pic ku video mustra pari euro,,kaminda bon por pagami te ainda.. Mi ta traha hopi duru pami sen y niun pero niun hende unta bin tumami hasi..

Anto si ta nesesario lo mi post algun screenshot di tur e 4 siman nan ku Shanty ta bira pa paga.

Kimskeer a bira shantyskeer

Un feliz dia verder

 

Ban mira Shantyskeer awor si a yega ora pa paga òf entrega e kabeinan bèk i kana manera spanta para.

E siman aki tempu a bai laga nos. Kuminsando for di otro siman e resúmen lo konsistí solamente di items nan ku ABO lo ke mira. E por ta un notisia pero tambe algu kubo mes persona a pasa aden. Pa hasi esaki ta masha fásil. Djis tuma kontakto ku nos via di facebook òf pa medio di e paginá di kontakto riba nos website www.takimitabeba.com. Bo item mester konsistí di entre 250 pa 300 palabra na e idioma ku abo mes ta deseá. Nos ta masha interesá pa sa kiko tur boso ta eksperensia durante di siman. Nos lo no divulgá bo nòmber sin bo pèrmit.

Aunke bo no a kobra awe, tòg ta djabièrnè. Ta di koba saka bleki di tuna ku ta hole kakalaka, herebé e ham ku bo tin for di aña pasa den frizer i koba den tur lachi wak si tin sèn largá pa sera kumpra gasolin.

En todo kaso. Laga nos despedí di bo rekordando bo ku maske:

E siman aki resúmen tabata kòrtiku, den Kaya Kiwa un tipo a kòrta su “brasa di beibi” zuai den kura i Ivar Asjes Jasjes Credit Pasasjes a yega Vatikano promé ku Pastor Simon…

T’aki mi ta BEBA

E siman aki atrobe nos ta presentá bo un reseta fásil i ku no ta rekerí ingredientenan karu.

Kuki di ‘Pinda’
Ingredientenan:

1 kòpi di pindakas

1 kòpi di suku

1 kòpi di suku brùin

1 kòpi di res

1 telep di baking powder

1 telep di salu

1 telep di vania

2 webu

3 kòpi di ariña di pan

Preparashon :

Den un kòmchi nos ta pone tur e ingredientenan huntu. Ku un mekser òf kuchara di palu nos ta meskla nan tur bon den otro. Ora e meskla ta kla nos ta kohe un plancha hunta esaki bon ku res i ta stroi un tiki ariña di pan riba dje. E fòrnu tambe nos ta sende entre tantu na 350 grado. Ku un kuchara nos ta saka for di e meskla i forma e kukinan i pone nan den e plancha. Por stroi algun pipita di kolo ariba pa e por keda un tiki mas bunita. Ora ta kla ta pone e kukinan pa 10 pa 15 minüt den fòrnu. Ora nan ta kla nan ta baha bon ku un bon kòpi di te.

Resúmen di siman (35)

1. Derk Kleinveld ta propietario di Smallfield Adventures boat trips Curaçao. Ku e yate“Party Hooker” e ta ofresé charter na gruponan di turista i hendenan lokal ku ta gusta e deporte di peska. Siman pasá Derk i su tripulashon a bira víktima di abuzu kousá pa algun miembro di Warda Kosta. E la splika nos ku:

“Oompie Stroopie, un berguenza total, sla den turismo atrobe, ora boto du kustwacht para charter boat, kontrola, tuuuuur kos tabata na ordu, e ora ey nan a kumisa inventa; ku no tin mag di piska riba laman grandi ku mas ku 4 linja, ora puntra kustwacht ki artikulo di ki verordering , nan no sa, ora capitan puntra pa su but, mas ku 5 biaha, no ke dune, pero kustwacht ta kuminsa pusha, saka arma(klop) tira kapitan abou, kwe su telefon dal e abou , ora nos ke filma e soseso, despues menasa ku ta aresta… tur esaki dilanti turista…. habusu di poder, onbeschoft, anto a final e issue mes… a ta kore bai, sin duna e verbaal… unda nos ta bai asina.. berguenza ku nos autoridad riba laman”

Na mucha hopi di nos a soña di bira Batman, Aqua Man, Superman, Hulk, Superwoman òf un otro super héroe. Segun tempu ta pasa bo ta krese i mayoria soñadó ta ripara ku esaki no ta posibel. E grupito chikitu ku tòg ta sigui kere den fantasia ta buska un trabou kaminda nan por hunga badjòn komo konsekuensia e suseso ariba menshoná.

Bo a subi un boto pa hasi kontrol. Na momentu ku nada ilegal no wòrdu hañá no ta keda bo nada mas di baha bo le senk for di kos di hende i zuai yama ayó. Pero no, bo ta preferá di ridikulisá bo mes i bo tim inventando un lei ku asta un mucha di 5 aña lo grita hari. Awor ku e fli no a subi bo a rabia, kibra telefòn, saka klòp i pusha hende inosente na suela. Hinter e “Carrucel de niños”  aki a sosodé dilanti di un grupo di turista ku sigur lo konta esaki ora ku nan ta bèk na nan pais.

Es desir aparte ku bo ta abuzá di hende inosente bo a duna un grupo di turista un bista kompletamente robes di Warda Kosta i di bo pais. Laga nos spera ku outoridatnan konserní lo sa di tuma e pasonan korekto kontra di esun nan ku a kometé semehante disparate.

2. Beef, karni, vlees, carne. Esaki ta resultado di un diskushon entre un mikrofonista i un (posibel) simpatisante di Gerrit Schotte. Tur kos a kuminsa na momento ku e mener aki a splika ku:

 “Radio Direkt ta pio ku Fox News ruman. Gewoon triest kon e hendenan aki ta drai. Kedaaaaa riba Schotte, kaminda Schotte tin anjos ni den gobiernu, keda defende Emsley “korupto” Tromp pa bai dilanti! Enbes di bosnan wak tur e kakadanan di e gobiernu sinta ta keda pompa den pasado. Esnan ku ta paga bosnan ta paga bosnan bon ohm! FIES bosnan ta, triest gewoon! No wonder bosnan lo keda den bom”

E kos no a keda te ei ya ku e tim di Radio Direct a wòrdu pone na altura di e deklarashonnan i pa medio di Richeron Balentin nan a kontesta entre otro lo siguiente:

“Felis dia yave. Mi a bel bo algun biaha te asta na trabou. pa mi por splika bo un ke otro. Si bo tin pregunta tokante kualkier item bel libremente pa mi splika bo kiko ta kiko. 5605333 Ora bo ta komenta algu buska pa sa prome i no saka konklushon i skibi kos sin ta na altura. Basta ratu mi ta sigi bo komentarionan tokante Radio Direct. Danki pa skucha”

Asina kosnan ta bai den aña 2015. Opviamente mester tene kuenta ku loke tin skibí riba bo “wall” por sòru pa Radio Direct pone bo bou di vigilansia estrikto. E por ta zona prèt pero pa nos e asuntu aki ta nifiká inisio di un trènt: intimidashon via di social media. Ta nada otro nos no por saka for di e situashon aki. For di ora bo bisa un hende ku ta basta ratu bo tin ta sigui su komentarionan ta paso ta sea “gustamentu di hende hòmber” tin òf slùip bo ta slùip e.

En fin. Si akaso e beef aki mester kulminá den un pelea nos lo bèt 500 florin riba nòmber di Sharif “el bailarin” Sprockel.

3. Luzbella Jamanika. Pa esnan ku no konosé ainda, e damita aki tin un trayektoria largu di forma grupo i organisá eventonan ku mayoria bia ta kaba di un manera pekuliar. No opstante esaki e ta sigui ku su hòbi lokual tòg ta algu di aploudí.  Te kaminda ku nos por kòrda Luzbella a sòru pa lo siguiente:

• Grupo di Seú
• BBQ pa por partisipá na marcha di Seú di Bándabou
• Diva’s Fitness Bootcamp
• Workshop di makiahe

Despues di un par di luna sin tende nada e tei bek ku algu nobo . E biaha aki e ta duna tur mucha di Kòrsou e chèns pa inskribí nan mes pa partisipá den karnaval 2016 ku: The Diamond Kids. Nan lo wòrdu kompaña pa Gio Fuertisimo. Komo ku e responsabilidat aki ta unu enorme e grupo ta buskando 6 leidster i 10 waiter. Pa por apliká mester tuma kontakto via di e Facebook pagina Grupo Diamante. Den luna di sèptèmber lo bai demostrá nan trahe na públiko.

Aparentemente grupo di karnaval Chikitous no ta bai marcha otro aña. Esaki ta un bon momentu pa Luzbella mustra pueblo di Korsou kiko e tin aden i tur esaki pa solamente 450 florin. Laga nos spera ku no ta e paña di Seú ku tabata falta bala bala e ta bai recycle.

4. Ya tin algun siman ku un kalor inmenso ta asotando Kòrsou. Temperaturanan di 33 grado pero ku un sensashon di 39 te ku 42 grado ta tópiko di diskushon. Èrko ta drai overtime, weave ta smelt, tas di marka su emblema ta lòs i silicon den pechu i atras falsu ta kuminsá herebé. Manera bo kana mas ku 5 meter den solo bo ta sinti bo kabuya di kurason trèk i sodó di bo kurpa basha di bo kabes pasa na bo lomba i terminá na bo hilchi di pia.

Nos hermana isla Aruba tambe ta sufriendo bou di e mesun sirkunstansianan. Palu nan a seka i asta promé minister di Mike Eman su mustashi a kuminsá pèrdè kabei. Aparte di pèrdèmentu di kabei e kalor aki ta pone hende pèrdè kabes tambe.

Un tipo notablemente fadá di e kalor a disidí ku e ta kita blo sunú  i sali bai kumpra eiskrim na pòmp di gasolin Texaco ku ta keda na Pos Pabou. Bishitantenan di e pòmp no a por a kere nan bista. Dos damita sintá den un outo a baha glas pa inspekshona e tipo aki di aserka. Di ripiente unu a grita:

“Holó!, e gayo aki tin asina un slang amiga”

Mesora su amiga a bira kontest’é:

“Awèl amiga mi tei pidié 10 florin di Super!”

No ta konosi si e eiskrim ku e tipo aki a kumpra a baha bon

5. Ta falta solamente un siman pa Curaçao North Sea Jazz Festival ranka sali. Despues di nasementu di niño Hesus CNSJF ta evento kaminda hendenan ta saka plaka pa loko. Aparte di ku e karchinan di entrada ta basta pika, ta masha kumpramentu di paña i sapatu tin paso na “Djèèèzzz” tin masha shomentu di “Drèèèsss”. Den tur e bromamentu malu aki nos ta lubidá ku tin hende ku ta nèt nèt nan a logra haña un karchi.

Un di e tipo nan aki ta Yves “El loco Hugo” Cooper. Faltando poko pa e festival aki kuminsá ketu bai e ta wardando riba un donashon den forma di un kamisa,sapatu i un left pa e por yega na e festival.  Pa medio di Resúmen nos kier a partisipá ku djaluna awor lo bai tin un téletòn pa rekoudá e fondonan nesesario pa un wayabera i sapatu di marka Florsheim den boka di pueblo konosí komo “Floorshaain”.

Si akaso bo kier koperá di un forma anónimo esaki tambe ta posibel. Djis manda un e-mail na oompiestroopie@takimitabeba.com i nos lo sòru pa e donashon yega su destino.

Nos ta pidi koperashon di pueblo kompletu pa por fabor no manda kondon komokiera ku e último bia ku esaki a sosodé Yves a bistié na su kurpa keriendo ku ta kamisa estilo “body-fit”.

E resúmen aki nos te termin’é pidiendo bo pa bai poko poko wikènt benidero.  Tin basta aktividat planiá pero esun ku sigur nos lo keda pendiente di dje ta “Welcome to Soutbeach”. Durante di anochi aki bo por spera damitanan for di merka skars bistí i bulando di palu pa palu estilo “donkey kong”.

Ta imposibel pa nos tuma despedida sin rekordá boso ku maske:

Gasolin lo baha ku un miserabel 5 sèn, a pone 18 mion florin disponibel pa restourá Sentro Pro Arte pero tin hende ku ta wardando 20 aña riba un kas i chèns ta grandi ku otro siman ta un solo fiesta lo dominá e resúmen…

T’aki mi ta BEBA

Ya ku boso a kobra ata un reseta un poko “du” aki.

Pudin di Uster

Ingredientenan :

2 bleki di uster 2 kuchara grandi di e awa di uster 2 kuchara grandi di lechi 2 kòpi di pan kòrta na pida pida sin kaska 1 lechi di konofló 1 tomati mediano kòrta chikitu 1 siboyo mediano kòrta chikitu 6 kuchara grandi di manteka. Djis un tiki salu, peper, nétumuskat, komino.

Preparashon :

Nos ta pone e siboyo, tomati, e konofló hasa den e margarina. Despues nos ta pone e pannan aserka, laga nan tambe hasa un tiki. Kaba nos ta pone e usternan i e spesereinan aserka i nos ta drei bon, pero ku kuidou pe usternan no garná. Huntá un forma bon huntá ku manteka i basha e meskla di uster den dje. Awor nos ta basha e meskla di awa di uster i lechi riba e pudin di uster. Pone e fòrnu na 375 grado i lag’e keda 30 minüt den fòrnu. Kòrda prek e, wak bon si su paden tambe a kushi. Lag’é fria, kaba sirbié. E ta dushi !

Resúmen di siman (29)

1.  Jean Julien Rojer. Huntu ku su partner di wega Horia Tecau e la sa di titulá komo kampion di torneo Wimbledon den e kategoria men’s double aya na Inglatera. Naturalmente pueblo di Kòrsou en general ta hopi orguyoso di e hazaña históriko aki. Facebook tabata yená ku mensahenan di elogio i felisitashon.

Nos a keda masha enkantá ku tur esaki pero alabes tambe hopi babuká pa e nivel di ortografia.  E torneo ta karga e nòmber di Wimbledon, no ‘Wimbeldons’ ni tampoko ‘Wimbelden’. Ta erornan ku no ta na nodi. Si bo no sa òf tin sigur kon ta skibi un palabra, djis taip e den Google i lo bo haña e kontesta.

Naturalmente ningun hende no ta perfekto pero por fabor paga mas atenshon na bo ortografia. Kada disparate kubo pone riba papel ta yuda hiba bo imágen i kredibilidat den krili su wela. Por ehèmpel un karta di solisitut ku ta kontené hopi eror ta duna bo ménos gana di les’e. E lo pasa di man pa man komo algu pa chèrcha.