Mi no ta desea bo un Bon Aña, pero…….

Asina 2015 a pasa.
Tur e bon deseo nan i tur e bon intenshonan di aña pasa, kon a para ku nan?
Bo ta tribi di analisa kiko bo a logra, loke bo a mejorá i kon produktivo bo tabata? Atrobe nos ta na komienso di un aña nobo. Ta tradishon pa bisa otro ku bo kièr miranan prosperá den e aña nobo. Pero ku deseo so nos niun lo no logra nada. Bo no por prosperá sin traha.

365 Dia a pasa

Wak bèk i lo bo mira ku 365 dia a pasa anto ketubai korantnan ta yena “Front page” yen yen di negativismo. Positivismo ta hanja e espasio di más chiki den korant. No tin nodi di skonde negativismo, ta e realidat di Kòrsou. Ku medionan di komunikashon moderno, gratis i mucha mas rapido ku korant, no tin nodi tampoko pa yena e “front” ku notisia polisial. E gran mayoria ya ta na altura.

Wak bèk i lo bo mira ku 365 dia a pasa, den kual tur minister a saka potrèt bromando ku prome piedra, inisio di trabou di infrastruktura, hospital nobo o nombrando un komishon enkargá ku trabou ku ambtenaar ya ta wordu pagá pa hasi. Kon porta ku e mesun hendenan ta keda nombrá den komishonnan ku topikonan totalmente distinto? Pa difinishon, fo’i ora bo ta bon den tur kos bo no ta eksperto den niun. E generashon nobo no ta hanja oportunidad pa demonstra su abilidad y konosementu. Despues di tur e lunanan ku pueblo di Banda Bou a sufri na altura di Tera Kora, tòg e kaminda a transforma den un zwembad ora awa a kai.

Wak bèk i lo bo mira ku 365 dia a pasa, den kual minister di hustisia a nombra hefe di polis nobo, otorga kuerpo autonan nobo, lanta politur i pidi pueblo entrega arma. Atrako, ladronisia di auto i assesinatonan a sigui. Pa ladronisia o algun atrako riba e suidadano inosente polis no ta presenta mes mas. Pero dia a tira riba polis diripiente ta tin sufisiente auto pa tur subi kaya.
Wak bèk i lo bo mira ku 365 dia a pasa den kual polítikonan a broma ku logro di deportista, pelotero o miss universe sabiendo ku nan no a kontribui nada na e logró. Ora Jean Julien tabata lucha pa subi nan no tabata sa mes. Saka potrètpone den korant ku Andrew Jones brasá mas duru ku e groupiesnan para na waya den Beisbol Week. E tey drecha stadion di Little League na Muizenberg. Stadion ku por sierto a wordu drecha djis poko aña pasá. Lunas a pasa ahinda stadion ta snòk snòk será. Mi ta pusta ku trabou lo kuminsa djis prome ku elekshon.

Wak bèk i lo bo mira ku pa 12 luna largu pueblo di Kòrsou a paga 21 parlamentario mas ku 10 mil florin pa luna pero tòg bo por konta e lei nobo nan riba bo dedenan. No a kambia niun lei di trafíko,  no a kambia niun lei di medio ambiente, no a traha ni un kas na Wechi,  no a aktua kontra niun konstrukshon illegal den Pietermaai, no a aktua kontra niun doño di kas bieuw riba ruta di Karnaval, no a konstruí un “kruithuis”nobo. Si a basha kas di un pober abou na Montaña. 365 dia a pasa i ketubai nos muchanan ta bai skol sin kome, ketubai nos muchanan no por haña lès di natashon na SDK,  ketubai nos muchanan no ta haña lechi na skol. Ketubai edifisionan di gobiernu ta pará bashi, pero departamentunan ta hür kantor serka amigu di partido.

Mi no kièr ta pesimista, pero e berdad ta ku nos realidat ta negativo. Esey nos no por ninga mas. Realisá ku pais Kòrsou tin demasiado problema. Mester solushoná nan, unu mas lihe ku e otro. Realisá ku hopi di esnan ku a yuda krea e problemanan, lo no por yuda solushoná nan.

Pa 2016 resultá un aña próspero, Kòrsou mester pidi yudansa riba diferente tereno purá.

No mester tin miedu di atmiti ku mester di yudansa. Pa kompleta un logro nos lo tin ku laga flohera, traha, soda i produsí. Nos lo mira lus na final di e tunnel solamente si nos move nos yangado marchando pa dilanti.

………………… mi ta supliká bo pa traha duru na mehoransa di Kòrsou.

Kòrsou let’s get it right in 2016!