Resúmen di siman (52)

Kanisha Sluis ta sorprendé mundu kompletu na Miss Universe

Despues di a warda hopi tempu porfin e pueblo di Kòrsou a bolbe uni i ta Kanisha Sluis a sòru pa esei. Djadumingu promé ku e show ainda e interes den su partisipashon tabata abou. Manera ku Steve Harvey a anunsi’é komo un di e diessinku finalistanan tur hende a bira loko!

Facebook a yena rant rant di famia, amigu, konosí, bisiña, yùfrou di skol, stewardess i polis ku supuestamente konosé  “NOS” Kanisha. Kaya a bira blo bashí i hasta tokonan chines a sera porta lagando vários atrakador i polítiko ta lombra wowo. Asta e karta ku minister Suzy Camelia Romer a manda ningando AVA Airways un pèrmit pa establesé su mes riba nos isla no a kapta ningun hende su interes.

E situashon a bira muchu mas histériko ora ku a anunsiá Kanisha den e dies finalistanan. Parlamento a konvoká un reunion èkstra ordinario kaminda unánimemente a aseptá, un moshon pa smèlt e estatua di Doktor Frumencio da Costa Gomez i traha un nobo na semehansa di nos Kanisha. Alabes Parlamento a disidí ku entrante 1 di mart 2016 Gomezplein lo karga e nòmber di “Plasa Kanisha Bon Bala Sluis. Na final di kuenta nos no a logra bai ku e korona. Miss Colombia a keda korona komo Miss Universe ya despues di 2 minüt e mester a entrega esaki na Miss Filipina pa motibu di un eror ku e komediante Steve Harvey a kometé.

En todo kaso. Nos Kanisha ta bek na kas i a dun’e un kaluroso bon biní! Disfrutá di e imágen i videonan ku nos a hòrta for di riba internèt pa boso.

Un bia mas danki Kanisha.

Karchi di entrada pa Noche Buena @ Brakkeput Mei Mei

Kontinuando ku bo resúmen di siman nos kier a pone lus riba algu di ménos importansia i ku ta rekerí un nivel abou di inteligensia pa komprondé. Ta trata aki di e famoso fiesta di Noche Buena na Brakkeput mei mei. Tur aña di nobo ta sosodé e mes un estupides. Karchinan ta wòrdu poné na benta, hendenan sin moda di muri ta fòrsa kumpra pa despues nan bende esaki keriendo, ku por generá ganashi pa paga seguro di outo, silikon pa pechu òf boto pa Fuikdag.

Den transkurso di siman nos a mira vários persona ku di un òf otro manera a hinka den nan kabes pa rebendé nan karchi na un preis di lokura. 250, 300, i 400 florin ta montantenan ku tabata skeiru sin ningun klase di bèrgwensa riba medionan sosial. Tin hende ku asta a ofresé karchi a kambio di un tereno erfpacht ku un grandura mínimo di 600 meter kuadrá.

Ta ser bisá ku temporada di Pasku ta pa trese pas den tur kas. Ta riba nos pida baranka so bo ta haña e sintimentu ku diabel i hinter su gèng ta lòs. Hamas de los hamases un hende na tinu lo paga un preis asina haltu pa un karchi. Kuminsá peña saka. Ku Afpakteam aktivo e chèns ta bira mas chikí atrobe. Tur hende ta kouteloso kon nan ta gasta plaka pa evitá ku e team di Norma(n) Serphos ta presentá na nan porta.

En fin. Laga nos sa ken tur a bringa mainta despues di fiesta i manda nos potrèt di e crew ku a drenta mardugá estilo Miss Universe i sali mainta riba un “Billenshake”.

Pasku di nasementu, Pasku di gatiamentu

Si bo bishitá un iglesia katóliko riba Pasku di nasementu anto e frase aki mester ta zona konosí:

“Agwéé noows tur a bienie huntoe pa seléébrò béénido di Niñoow Héésoes. Lògò noows réésò”

Misa ta yen di hende i bo wowonan ta hasi doló di prenda i payèt ku ta bria sin miserikòrdia. Na bo man robes tin un mucha di mas o ménos 5 aña sintá. E ta asina gordo ku e streki ku a mara na su kabes ta lag’e parse un regalo bon paketá. Djis bo dilanti tin un ansiano un poko surdu ta blo bisa su yu na bos haltu ku: “mi tin pishi”.

Ku un kara tur ral bo ta kòrda chukulati kayente, lèter, ham i ayaka ku ta poné riba mesa na kas. Di ripiente bo ta mira tur hende lanta para… Ta ora pa duna pas. Djaleu bo ta mira e bisiña ku nèt un siman promé a saka machete riba bo ta kana bin. Pa no krea un esena di novela bo ta dun’e un man i ku un smail riba bo kara, bo wowonan ta koba su mama. Misa ta kaba i bo ta kue kaminda di kas.

Yegando bo porta di kura bo ta nota dos outo yen di hende. Den nan tin famia i konosí, mihó konosí komo gatiero. Nan a bini ku e meta pa habraká, susha bo kas i bai laga bo atras morto kansa.

Fo’i banda riba te banda bou t’esaki ta Pasku na Kòrsou.

Mgr Luis Secco ta skapa na wowo di angua

Na komienso di siman NOS obispu a hañ’e envolví den un aksidente di tráfiko. Fuentenan verídiko a indiká ku un konvoi a pasa den lus kòrá i kousa e aksidente. Danki na Dios, Allah i Budha monseñor no a risibí ningun sla di gravedat. Na momentu ku polis kier a kuminsá ku e investigashon a reina un konfushon total. Niun kaminda no por a haña e shofùr di konvoi. A buska asta den monseñor su saku di Sinterklaas pero esaki tampoko a duna resultado.

Pa medio di T’aki mi ta BEBA polis kier a hasi un apelashon riba públiko pa yuda ku e investigashon. Si akaso bo tabata den besindario na momentu di e aksidente por fabor sea asina bon di pasa na kualke warda di polis i duna bo deklarashon.

Den kaya tin papiá ku ta un pastor ku pa largu tempu ya niun hende a mir’e ta tras di asuntu aki. Na e sitio di e aksidente a bin enkontrá un kantidat di kamisa estilo “miami vice”, dos maraka i un blòkflùit. Tambe polis a konfiská un bòter di e bebida “night train”.

E investigashon den e kaso aki meskos ku hopi otro mas ta kontinuá

Emporia Curaçao White Edition

Un di fiestanan ku ta hopi popular den e luna di desèmber ta Emporia i no mas ku dos dia pasá esaki a tuma lugá den WTC. Diferente banda i Dj konosí a deleitá e públiko presente ku músika na nivel haltu. Tambe nan por a gosa di un bon presentashon di baile kordiná pa Nj Entertainment & More. Riba e diferente potrètnan (kortesia di GO Weekly) bo mes por mira kon dushi e ambiente tabata.

Un kos so nos tin di remarká. Nos mester kuminsá tene nos mes un tiki mas mihó na temanan di fiesta. Si e anochi ta rekerí bo bisti tur na blanku, por fabor no bini ku otro kos bisti. Bo ta keda mes kos ku un pida dròp den un baki yen di mentos.

 

  
Fin.

Na promé lugá un bon Pasku na un i tur. Ku e dia aki trese tur loke boso ta deseá den kompania di famia, amigu i otro sernan kerí. Bai poko poko ku komementu di ham i ayaka paso un djis ta karnaval i e trahe mester fit. Un saludo pa tur esnan ku na e momentu aki ta para pafó di misa ta kue serena. Hinter aña bo no a bai ta kiko bo a bai hasi awe si? Tambe tin esnan ku ya ta riba ruta pa e fiesta di noche buena na Brakkeput mei mei. Bai poko poko i kòrda ku djaluna bo mester por presentá na bo boka di trabou kara na laria. Por último no lubidá di bai kas promé ku solo sali, no ta tur hende mester sa ku El Chupacabras ta biba na Kòrsou.

Bueno. Awor si nos ta bai despedí di bo si no e aros ku lechi riba stof ta kima. Naturalmente nos no por hasi esei sin rekordá bo ku maske:

Tin un pelotero morto spantá ta ninga redondamente ku e la mishi ku kos di hende, kontrali na aña pasá Shon Fia ta lansa su kampaña “fia 10 paga 1000” for di djaluna awor i doño di un korant konosí a pidi pa niun hende no bini su fiesta ku gatiero, telefòn selular i no tin stul pa sinta….

 

 

T’aki mi ta BEBA