Resúmen di siman (34)

1. E bon yu’i Kòrsou ta kore outo na un manera responsabel. Ora e ta den ‘bebouwde kom’ e ta baha spit i keda alerta pa por ehèmpel muchanan òf kachó ku krusa kaya direpente. Lamentablemente den e kaso di Chuchu kosnan a bai otro. Na un edat hopi yòn e la keda ranka for di e mundu aki. Un outomobilista iresponsabel a pasa dal e dilanti di su porta di kas na Granadiersweg sin sikiera bira wak patras. Chuchu a keda benta riba kaya kaminda e la bin fayesé pa motibu di e heridanan ku e la sufri.

Famianan di e defuntu tabata hopi rabiá i a bisa entre otro ku:

“mi no por kere ku existi gente malu sin corazón asína, mi no ta comprende kon nan por drumi anochi, si e persona ta lesando esaki, mi ke pa e sa tur e sufrimiento y tristesa ku e a laga den nos corazón, nos ta hanja disgusting ku hende mane e ta kana den mundo”

 “BO A DAL MATA UN MIEMBRO DI NOS FAMILIA ANTO BO A CORRE BAI MANE TA BASURA BO A DAL … Warda trankil pasombra karma ta bin pa bo!”

Ta hopi duru pa pèrdè bo bestia di kas ku tantu bo ta stima. Si bo mira kon hende ta trata otro anto lo bo no keda strañá di mira nan trata bestia di e forma aki.

En todo kaso. Yamando e tipo di  hendenan aki bestia ta un insulto pa e bestianan di bèrdat.

2. Coraline Kooistra ta direktora di Stichting Tegen Kindermishandeling – Advies en Meldpunt. Meta di e fundashon aki ta pa duna konseho, tuma keho, hasi intermediashon i ofresé ayudo na víktima. Ku hopi amor i pasenshi e ta hasi e trabou aki.

Mayoria hende no sa, pero keda sin paga plaka di alimentashon p’abo yu tambe ta un tipo di abuzu. Corah ta atendé tur dia ku tipo di kasonan asin’aki i lógikamente su kana sa yena.

Esei ta loke netamente a sosodé durante di siman i pa medio di su Facebook e la splika ku:

“Awe mi ke ta un poko mas direkto ku normal. Na tur e hòmbernan riba Facebook ku ta blo ta pone versíkulonan di Beibel i foto di nan outo, i foto di nan fakansi, ku mi sa i ku nan sa ku mi sa, boso por pleassseee bai alimentá boso yunan? Nan ta warda boso pa buska nan i pasa tempu ku nan. Danki i felis dia.”

Corah su mensahe ta mas kla ku di dia. Bo ta preferá di gasta plaka na:

• Tatuahe rònt bo kurpa
• Muhénan marka “ hunga pa fia” pero ta bo so a “hunga pa tuma”
• Sigá, bòter di bebida i brel di solo karu pa broma den fiesta
• Outo nobo lagando e prijskaartje ta kologá pa tur hende mira

en bes di kòrda riba bo responsabilidat komo tata. Un saludo pa tur e muhénan ku tin algu ku un hòmber ku no ta kria su yunan. Masha danki pa sigui hinka e komunidat aki un tiki mas den krili di su wela. Komo muestra di apresio nos ke regalá boso e batata aki. Hasi bon uzo di dje.

3. Un bebida típiko di nos isla ta awa di lamunchi. E ta baha refreskante i ta yuda hopi bon den temporada di kalor. Si ántes tabata duna mucha esaki bebe ora plaka pa kumpra Tang, Sun Quick i Tip Top kaba awor e ta un bebida luho. Mayoria establesimentu ta bende esaki na un preis basta pika.

Nan ta huzga ku ta trata aki di un produkto natural ku ta tuma hopi tempu pa por prosesá. Mester subi palu kita lamunchi, kòrta i primi esaki nan pa finalmente bo tin e ekstrakto ku por wòrdu bendé.

Pa karu ku e ta semper bo tin e opshon di keda sin kumpr’é. En bes di puntra e preis pa un glas nos ta preferá di laga orguyo hinka nos den kataklismo. Ta ora ku e kuenta yega nos ke rabia, sulfurá i manda potrèt pa Yves Genghis Khan Cooper pone riba su Facebook. Riba e mundu aki nada no ta pareu. Bo a kore yega den bo “esjuvie” , habraká un kuminda i bebe awa di lamunchi haragan manera mucha ku a kore hunga bala den solo. Awor ku e ora di paga a yega si ta kore rabia paso un glas di awa di lamunchi ta nafl. 7,50.

Awèl drechi pa bo shon. Saka bo pòtmòni di Gucci, paga i bai planta palu di lamunchi den bo kura di kas.

4. Alex Rosaria ta miembro di Parlamento i lider di koalishon pa partido Pais. E chèns ta grandi ku e nòmber aki no ta bisa bo masha. No sinti bo malu pa esei paso ta un echo ku kasi nunka bo ta tende algu di e mener aki. Ni malu ni bon. E último biaha ku a skucha algu for di su boka tabata e momentu ku e la pidi su bodyguard pa defendé di un manifestante ku kier a bis’e algu durante un manifestashon na Bándabou.

Den transkurso di siman a surgi e rumor ku Alex Rosaria a dal abou manera patia bèrdè despues di a baila dos piesa durante un happy hour na Tutu Tango. E lo tabata bou di su awa i na final ta dos bodyguard a yud’é lanta i kana bai outo.

Fantástiko, great, hopi bon Alex. Danki pa laga e pueblo mira na kiko su plaka ta wòrdu gastá. Bo por a sikiera invitá poko di esnan ku soketemente a vota p’abo awe por tin e luho di baila malu, bebe fuma i dal abou. Ta mihó bo a bebe awa di lamunchi.

Naturalmente kosnan asin’aki tin nos pueblo fadá. Si bo tambe ta un di esnan ku ta konsiente ku asina aki no por sigui, mi ta sugirí bo pa tira un bista riba e página di Facebook aki.

5. E último biaha ku a subi O.B tabata den mei di 2013. E tempu ei minister Jardim a sòru pa O.B a subi di 6 porshento pa 9 porshento. Grandi tabata nos sorpresa ora ku e siman aki e mes un minister a anunsiá un proposishon pa bolbe subi e tarifa di O.B di 9 pa 11 porshento riba sierto produktonan.

Ta kuantu medida mas e pueblo aki por soportá ? Paso ta ei tur kos ta keda segun hopi hende: na medida. E plaka èkstra ku ta drenta ta na kiko e ta wòrdu gastá ?

Ketu bai:

• Nos kamindanan ta kibrá
• Skolnan falta material pa duna lès
• Huma di Isla tin nos choka
• Lista largu di hende wardando riba un kas

Laga nos komprondé otro bon. Loke nos ta pidi ta klaridat. Minister Jardim por fabor splika e pueblo mansu aki kon bin despues di dos aña ke bolbe subi tarifa di O.B i kiko ke logra ku esaki. Si tin espasio pa sugerensia nos lo tin gana di mira un subida e tarifa di O.B pa produktonan manera:

• Bòter di shampaña
• Sigá
• Djente di oro
• Kabei falsu
• Karchi di fiesta

i tur sobra produkto pa hasi kos di “bon bida”.

Asina nos a bolbe yega na e dia ku mas nos pueblo ta stima: dja(m)ièrdè. E dia nan aki ta hasi un kalor insoportabel i ta obvio ku nos ta den temporada di orkan. Tormenta tropikal Danny probablemente lo pasa serka di nos islanan na komienso di otro siman. Ta premirá ku pa e momentu ei Danny lo ta un orkan di kategoria 1. Laga nos no drenta pániko. No tin mester di kumpra tur bleki di lechi, pèmper, kaha di galiña, saku di aros i kaha di serbes ku tin den supermarket.

Loke si ta bon pa hasi ta kontrolá si tur eternit riba bo dak ta hinte, bo weave nan ta bon wantá i ku den kura no tin artefaktonan ku por lanta vuelo i kousa daño na bo propiedat òf di otro hende.

Nos ta despedí di bo deseando bo un felis fin di siman pero kòrda ku maske:

Faltando 12 dia promé ku CNSJF ranka sali vários ta esnan ku ta bendiendo nan karchinan pa por paga seguro di outo, promé minister Ivar Asjes a laga sa ku “Ami no mester di politika pa mi biba” i e asuntu di Pastor Simon a manera muri un morto natural…

T’aki mi ta BEBA

Nos ta dediká e reseta di awe na tur miembro di partido Pais. Laga nos sa kon e la baha.

Bolo Borracho

Ingredientenan:

1 liber di manteka 1 liber di ariña di pan 1 liber di suku blanku 9 webu 1 bleki di lechi chikí 1 kuchara di kome kuné di Baking Powder 2 paki muisjes 1 bleki di slagroom 1 telep di esensia di almendra ¼ kùp di anis òf ròm 2½ paki di pudin di vania Algun chèri

Preparashon:

Primeramente ta bati e manteka i e suku bon, despues e webunan i ta brua nan den otro. Bati nan bon den otro y poko poko ta agregá ariña di pan, baking powder, esensia di almendra i brua tur kos bon den otro. Ora ku e meskla ta bon bati ta poné den un forma huntá ku res òf manteka den fòrnu na 375 grado pa mas o ménos un ora. Awor nos ta traha e pudin i lag’é para. Ora e bolo ta kla ta sake for di fòrnu i lag’é fria, pa despues korte den tres laag. Nos ta pone e parti abou dje bolo den un forma rondó i muhé ku bibida. Seguidamente ta pone e pudin, poko muisjes, e slagroom, i ta sigui asina te na e último laag. Ora ta kla ta dòrna e bolo ku muisjes i chèri i pone den frizer.