Kakalaka kudishi ku mal “vibe”

Falta poko pa aña kaba. Un djis nos pueblo ta kuminsa ku mesun kos nan. Mesun kustumber i kerensianan di semper.

No solamente e muhénan di kas, pero tambe esnan dèftá òf nan mari tur na dashi ku kòl ta baha bai plasa òf otro tiendanan “spiritual”pa traha nan reserva di tur sorto di awa i sensia pa kore ku fúku.

Desèmber ta tira klapchi sin fin, kome druifi 12or i tambe bula kandela pa trese suèltu.

Muhénan ta kuminsa limpia kas f´oi ariba te abòu ku awa di 7 sorto, awa pa trese sèn, awa pa trese hòmber i asta awa di kil pa tene marí.

Sinembargo, hopi ta keha i sulfurá paso aña ta den kaba i ainda un di bon no por a dal nan. 2016 ainda no tabata bon. Kos ta mane kana stanká. Nada no ke bai bon. Mesora e number 6 ta wòrdu konektá ku tur di malu ku a bati na nan porta. Òf e amiga aya ta haña falta di a hasi nan pisá.

Loke hopi no sa, ta ku ta nan mente mes ta e kausa di tur e bòl di hilu ku yama nan bida. No solamente nan mente, pero nan palabranan tambe. Loke bo pensa i papia ta pasa. Esaki ta wòrdu elaborá den e famoso buki “The Secret” pero tambe den bukinan religioso.

Lagami dunabo dos ehèmpel di e tiponan mará ku ta keda atrás semper i dos kos ku ta forma parti di nan rutina diario;

1.Biba bida di hende.

Nan sa for di nan kabes ken a logra kiko. Mas ku klaro ku nan NO ta kontentu tampoko di mira otro logra algu. Logro di amiga/u, bisiña òf famia ta bòltu nan di paden. Stroba nan di drumi anochi. Te hasta pone nan keda sin kumindabo.

Klaro ku nan sa tambe ken a kometé kua fayo. Nan ta na altura di asta orarionan diario di e ser “kerí” ku nan tin na bista. I ora redu ta kayente ta nan tin mas di bisa.

Shon, biba bo mes bida i konsentra riba bo mes metanan si bo ke bai dilanti.

2.Reklama tur kos.

Di djis pensa riba hende asinaki mi ta kue fadá. TUR kos nan ta reklama. Den tur kos nan ta buska sea un fayo òf algu negativo. Semper nan glas ta mitar bashí i no mitar yená. Ta mane kos ku kos negativo ta hasi nan kontentu.

Librabo for di e hendenan aki. No kana ku nan. No laga nan bin bo kas ni no buska moda pa ta den mesun kren ku nan.

Hende ku mal ”vibe” i aura pisá, ta mara so nan  por marabo. De fakto no ta nan ta marabo direktamente. Nan influensia negativo riba bo ta ponebo mara bo mes. Na hulandes nan ta bisa “wie met pech omgaat, wordt ermee besmet”.

Awor bo sa anto ku bo mente tin poder. Loke bo pensa ta pasa. Pues pensa positivo si bo ke biba un bida positivo. I librabo di tur plaga ku ta yama nan mes amistat.

Stòp di pone enfasís riba kosnan negativo i prinsipalmente riba kos di hende.

Ora un di bon dal otro hende, bira kontentu pe como si fuera tabata abo mes i bo lo mira kon di bon ta kuminsa dal abo tambe. Kos bon ta bini ora bo ta kla pa nan i ora bo merese nan. Pues stop ku kos di kudishi.

source: http://www.1000awesomethingsaboutcuracao.com

Si bo ke bo ta laba bo kas ku kua awa ku bo ke. Djis korda ku si ta abo mes ta pisá, niun awa ni sensia no por kambia esei. Pues kambia bo mente si bo ke ta diferente.

Nicole.